കോഴിക്കോട് അമ്മത്തൊട്ടിലിൽ രണ്ട് ദിവസം പ്രായമുള്ള ആദ്യത്തെ അതിഥി എത്തി; കുഞ്ഞിന് നൽകിയ പേര്…

കോഴിക്കോട് അമ്മത്തൊട്ടിലിൽ ആദ്യത്തെ അതിഥി എത്തി. ഇന്നലെ രാത്രി 8.45 ഓടുകൂടിയാണ് അമ്മ തൊട്ടിലിൽ രണ്ട് ദിവസം പ്രായമുള്ള ആൺ കുഞ്ഞിനെ ലഭിച്ചത്. കുഞ്ഞിന് ആദി എന്ന് പേരിട്ടതായി കേരള സംസ്ഥാന ശിശുക്ഷേമ സമിതി ജനറൽ സെക്രട്ടറി ജി.എൽ അരുൺ ഗോപി അറിയിച്ചു. സംസ്ഥാനത്തെ അമ്മത്തൊട്ടിലുകളിൽ ഏറ്റവും ആധുനിക സാങ്കേതിക വിദ്യയോടെ നിർമ്മിച്ചതാണ് കോഴിക്കോട്ടെ അമ്മത്തൊട്ടിൽ. കഴിഞ്ഞ മാസം 17-നാണ് കോഴിക്കോട് ബീച്ച് ആശുപത്രിക്കു സമീപം അമ്മത്തൊട്ടിൽ സ്ഥാപിച്ചത്.

കുഞ്ഞ് എത്തിയ വിവരം മൊബൈൽ അപ്ലിക്കേഷൻ വഴി ബന്ധപ്പെട്ടവർ അറിയുകയായിരുന്നു. ആശുപത്രിയിലെ ഡ്യൂട്ടി നേഴ്‌സ് കുഞ്ഞിനെ എടുത്തു. സമിതി ജില്ലാ സെക്രട്ടറി പി.ശ്രീദേവും സമിതി ജീവനക്കാരും ആശുപത്രിയിൽ എത്തി കുഞ്ഞിനെ കണ്ടു. കുഞ്ഞ് ആശുപത്രിയിൽ നീരിക്ഷണത്തിലാണ്.

ആ​ഗസ്റ്റ് 17ന് മന്ത്രി മുഹമ്മദ് റിയാസ് ഉദ്ഘാടനം ചെയ്ത അമ്മത്തൊട്ടിൽ മുൻ എംഎൽഎയും മുഖ്യമന്ത്രിയുടെ പ്രൈവറ്റ് സെക്രട്ടറിയുമായ എ.പ്രദീപ് കുമാർ, തോട്ടത്തിൽ രവീന്ദ്രൻ എന്നിവരുടെ പ്രാദേശിക ഫണ്ട് ഉപയോഗിച്ച് ആണ് നിർമിച്ചത്.