മാവേലിക്കരയിൽ സിനിമാപ്രവർത്തക അറസ്റ്റിൽ….
മാവേലിക്കര: വസ്തുതകൾ മറച്ചുവെച്ച് പാസ്‌പോർട്ടെടുത്ത് വിദേശത്തേക്കു കടന്നുകളഞ്ഞ സിനിമപ്രവർത്തക നാട്ടിലെത്തിയപ്പോൾ അറസ്റ്റിൽ. താമരക്കുളം കൊട്ടയ്ക്കാട്ടുശ്ശേരി സമദ് മൻസിലിൽ ഹസീനാ ബീവി (42)യെയാണ് ചെങ്ങന്നൂർ ഡിവൈഎസ്‌പി എം.കെ. ബിനുകുമാറിന്റെ നേതൃത്വത്തിലുള്ള പ്രത്യേകാന്വേഷണസംഘം അറസ്റ്റു ചെയ്തത്.തൃശ്ശൂരിലെ വാടാനപ്പള്ളി പോലീസ് സ്റ്റേഷനിലും തിരുവനന്തപുരം മ്യൂസിയം സ്റ്റേഷനിലും വഞ്ചനക്കേസുകളിലും നൂറനാട്, കായംകുളം സ്റ്റേഷനുകളിൽ ചെക്ക് കേസിലും ഇവർ ഇവർ പ്രതിയാണെന്ന് പോലീസ് പറഞ്ഞു.
2024-ൽ ഈ വിവരങ്ങൾ മറച്ചുവെച്ച് ഹസീനാബീവി എറണാകുളം റീജണൽ പാസ്‌പോർട്ട് ഓഫീസിൽനിന്ന് പാസ്‌പോർട്ട് നേടിയശേഷം യുകെയിലേക്കു കടക്കുകയായിരുന്നു. ഇതു മനസ്സിലാക്കിയ നൂറനാട് പോലീസ് കൊച്ചി റീജണൽ പാസ്‌പോർട്ട് ഓഫീസറുടെ റിപ്പോർട്ട് വാങ്ങിയശേഷം ഹസീനയ്ക്കെതിരേ കേസെടുത്തു.
പാസ്‌പോർട്ട് റദ്ദാക്കുന്നതിനുള്ള റിപ്പോർട്ടും പാസ്‌പോർട്ട് ഓഫീസർക്ക് പോലീസ് നൽകിയിരുന്നു. കഴിഞ്ഞദിവസം നാട്ടിലെത്തിയപ്പോഴാണ് അറസ്റ്റുചെയ്തത്. മാവേലിക്കര കോടതിയിൽ പ്രതിക്ക് ഉപാധികളോടെ ജാമ്യമനുവദിച്ചു.
