95 സൈബർ കേസുകളിലെ പ്രതി; രക്ഷപ്പെടാൻ ചാടി കാലൊടിഞ്ഞ ശേഷം ഒളിവിലായിരുന്ന മാരാരിക്കുളത്തെ തട്ടിപ്പുകാരൻ വലയിൽ

മാരാരിക്കുളം (ആലപ്പുഴ): രാജ്യമെമ്പാടുമുള്ള 95 സൈബർ തട്ടിപ്പുകേസുകളിൽ പ്രതിയായ കുപ്രസിദ്ധ ഓൺലൈൻ തട്ടിപ്പുകാരനെ മാരാരിക്കുളം പോലീസ് അറസ്റ്റ് ചെയ്തു. മലപ്പുറം വളാഞ്ചേരി, വടക്കുംപുറം നാലകത്ത് വീട്ടിൽ താമസിക്കുന്ന മുജീബ് (49) ആണ് പോലീസിന്റെ പിടിയിലായത്. ഇയാൾക്കെതിരെ രാജ്യത്തിന്റെ വിവിധ ഭാഗങ്ങളിലായി 95 സൈബർ പരാതികളാണ് നിലവിലുള്ളതെന്ന് പോലീസ് വ്യക്തമാക്കി.

മാരാരിക്കുളം മായിത്തറ സ്വദേശിയിൽ നിന്ന് 3,40,000 രൂപ തട്ടിയെടുത്ത കേസിലാണ് ഇയാളെ അറസ്റ്റ് ചെയ്തത്. ട്രേഡിങ് ആപ്പ് വഴി ഓൺലയിൽ വ്യാപാരം നടത്തിയാൽ വൻ ലാഭം നേടാമെന്ന് വിശ്വസിപ്പിച്ചാണ് ഇയാൾ പണം തട്ടിയെടുത്തത്.

കഴിഞ്ഞ വർഷം സമാനമായ ഒരു കേസിൽ ഹരിയാണ പോലീസ് ഇയാളെ അറസ്റ്റ് ചെയ്യാൻ ശ്രമിച്ചിരുന്നു. എന്നാൽ, പോലീസിനെ കണ്ടയുടൻ വീട്ടിലെ രണ്ടാം നിലയിൽ നിന്ന് ചാടി രക്ഷപ്പെടാൻ ശ്രമിച്ച മുജീബിന്റെ കാൽ ഒടിയുകയും തുടർന്ന് ചികിത്സയിലിരിക്കെ ഒളിവിൽ പോകുകയുമായിരുന്നു. നീണ്ട അന്വേഷണങ്ങൾക്കൊടുവിലാണ് ഒളിവിൽ കഴിഞ്ഞിരുന്ന പ്രതിയെ വളാഞ്ചേരിയിൽ നിന്ന് മാരാരിക്കുളം പോലീസ് സംഘം പിടികൂടിയത്. കൊല്ലം, പാലക്കാട് സൈബർ പോലീസ് സ്റ്റേഷനുകളിലും ഇയാൾക്കെതിരെ കേസുകൾ നിലവിലുണ്ട്.

മാരാരിക്കുളം എസ്എച്ച്ഒ പി.കെ. മോഹിതിന്റെ നേതൃത്വത്തിലുള്ള എഎസ്‌ഐ മഞ്ജുഷ, സി.പി.ഒമാരായ ആർ.ഡി. സുരേഷ്, ബി. രതീഷ്, വിനോദ്കുമാർ എന്നിവരാണ് പ്രതിയെ പിടികൂടിയ അന്വേഷണ സംഘത്തിലുണ്ടായിരുന്നത്.