യുഡിഎഫ് അധികാരത്തിൽ വന്നാലും മന്ത്രിസഭയിലേക്കില്ല…. ഇടതുപക്ഷ നിലപാടിൽ ഉറച്ച് ആർഎംപിഐ

തിരുവനന്തപുരം: കേരളത്തിൽ യുഡിഎഫ് ഭരണമുണ്ടായാൽ മന്ത്രിസഭയുടെ ഭാഗമാകാൻ താൽപ്പര്യമില്ലെന്ന് സൂചിപ്പിച്ച് ആർഎംപിഐ. നിലവിൽ യുഡിഎഫിന്റെ അസോസിയേറ്റ് അംഗമാണെങ്കിലും, പൂർണ്ണമായി ഘടകകക്ഷിയാകാനോ ഭരണത്തിന്റെ ഭാഗമാകാനോ പാർട്ടി തയ്യാറല്ലെന്നാണ് സൂചന. സ്വന്തം രാഷ്ട്രീയ സ്വത്വം നിലനിർത്താനാണ് ഈ നീക്കം.

മന്ത്രിസഭയിൽ അംഗമായാൽ സർക്കാരിന്റെ എല്ലാ തീരുമാനങ്ങളെയും കണ്ണടച്ച് പിന്തുണയ്ക്കേണ്ടി വരുമെന്ന് ആർഎംപിഐ കരുതുന്നു. ഇടതുപക്ഷ മൂല്യങ്ങളിൽ അടിയുറച്ചു നിൽക്കാൻ ആഗ്രഹിക്കുന്ന പാർട്ടിക്ക് ഇത് പ്രതിസന്ധിയുണ്ടാക്കും. എന്നാൽ, കെ.കെ രമയെ മന്ത്രിസഭയിൽ ഉൾപ്പെടുത്താൻ കോൺഗ്രസിന് വലിയ താൽപ്പര്യമുണ്ട്. ഇതിനായി ആർഎംപിഐക്ക് മേൽ കോൺഗ്രസ് സമ്മർദ്ദം ചെലുത്തുന്നുണ്ടെങ്കിലും പാർട്ടി വഴങ്ങിയിട്ടില്ല.

ഭരണം ലഭിച്ചാൽ ആര് മുഖ്യമന്ത്രിയാകും എന്ന കാര്യത്തിൽ കോൺഗ്രസിനുള്ളിൽ തർക്കം മുറുകുകയാണ്. വി.ഡി സതീശനെ പിന്തുണച്ച് എറണാകുളം ഡിസിസി പ്രസിഡന്റ് മുഹമ്മദ് ഷിയാസ് നടത്തിയ പ്രസ്താവനയാണ് പുതിയ വിവാദങ്ങൾക്ക് തിരി കൊളുത്തിയത്. എറണാകുളത്ത് നിന്നൊരാൾ മുഖ്യമന്ത്രിയാകണമെന്ന ഷിയാസിന്റെ നിലപാടിനെ തള്ളി വി.എം സുധീരൻ, കെ. മുരളീധരൻ, കെ. ബാബു തുടങ്ങിയ മുതിർന്ന നേതാക്കൾ രംഗത്തെത്തി. ഇത്തരം ചർച്ചകൾക്ക് ഇപ്പോൾ പ്രസക്തിയില്ലെന്നാണ് ഇവരുടെ പക്ഷം. വടകരയിൽ യുഡിഎഫ് സ്ഥാനാർത്ഥിയായി മത്സരിക്കുന്ന കെ.കെ രമയുടെ നിലപാട് മുന്നണിക്ക് നിർണ്ണായകമാണ്. അതേസമയം, സീറ്റ് വിഭജനത്തിന് മുൻപേ മുഖ്യമന്ത്രി സ്ഥാനത്തെ ചൊല്ലി കോൺഗ്രസിനുള്ളിൽ നടക്കുന്ന പോര് അണികൾക്കിടയിൽ ആശയക്കുഴപ്പമുണ്ടാക്കുന്നുണ്ട്.