അയ്യപ്പഭക്തരെ ആക്രമിച്ച ലഹരി സംഘത്തെ പിടികൂടി….പിടിയിലായവർ…

നെയ്യാർഡാം : അയ്യപ്പഭക്തരെ ആക്രമിച്ച ലഹരി സംഘത്തെ സാഹസികമായി പിടികൂടി നെയ്യാർ ഡാം സി ഐ ശ്രീകുമാരൻ നായരും സംഘവും. ശനിയാഴ്ച വൈകുന്നേരം 4.30 ന്ആണ് സംഭവം .നെയ്യാർഡാമിൽ വച്ച് കന്യാകുമാരി ജില്ലയിലെ ആറു കാണിയിൽ നിന്നെത്തിയ നാലു വയസുകാരിയുൾപ്പെടെയുള്ള ഭക്ത സംഘത്തിൻ്റെ വാഹനം തടഞ്ഞു നിർത്തി ചില്ലടിച്ചു പൊട്ടിച്ച് ആക്രമിക്കുക യായിരുന്നു. വിവരമറിഞ്ഞ് സ്ഥലത്ത് എത്തിയ പോലീസിനെയും അക്രമിച്ച് രക്ഷപ്പെടാൻ ശ്രമിച്ച പ്രതികളെ പരിസരത്ത് വച്ച് തന്നെ പിടികൂടുകയായിരുന്നു.

പോലീസിനെ ആക്രമിച്ച് രക്ഷപ്പെട്ട സംഘത്തിലെ തലവനെ തിരഞ്ഞ് കള്ളിക്കാട് നെയ്യാർ ഡാം റൂട്ടിൽ തുണ്ട്നടയിലെ വീട്ടിൽ പോലീസ് എത്തിയത് അറിഞ്ഞ് രക്ഷപ്പെടാൻ ശ്രമിച്ചെങ്കിലും സാഹസികമായി പിടികൂടുകയായിരുന്നു . സംഘത്തിന്റെ നേതൃത്വത്തിൽ പ്രദേശത്ത് വാഹന യാത്രക്കാർക്ക് നേരെ സ്ഥിരമായി അതിക്രമം നടക്കാറുണ്ടെന്നാണ് പരാതി. പൊലീസിന് നേരെയടക്കം കഞ്ചാവ് സംഘത്തിൻ്റെ അതിക്രമം ഉണ്ടായ പശ്ചാത്തലത്തിൽ പ്രദേശത്ത് നിരീക്ഷണം ശക്തമാക്കാനും നടപടികളാരംഭിച്ചു.

സംഭവത്തിൽ ഹിന്ദു ഐക്യവേദി കാട്ടാക്കട താലൂക്ക് കമ്മറ്റി പ്രതിഷേധം അറിയിച്ചു.അക്രമികൾക്കെതിരെ ശക്തമായ നടപടി സ്വീകരിയ്ക്കണമെന്ന് ജില്ലാ സംഘടനാ സെക്രട്ടറി പൂഴനാട് വേണുഗോപാൽ ആവശ്യപ്പെട്ടു.നെയ്യാർഡാം പെരിഞ്ഞാം കടവിൽ തുണ്ടുനട അരുൺ നിവാസിൽ അഖിൽ രാജ് (32) കാണിക്കാവ് കുഴിവിള വീട്ടിൽ ശിവലാൽ (23) കോലിയക്കോട് റോഡരികത്ത് വീട്ടിൽ ഷാരോൺബാബു (22) കാലാട്ട്കാവ് കുന്നിൻ പുറത്ത് വീട്ടിൽ അഖിൽ (20) കാണിക്കാവ് അനന്തു ഭവനിൽ അനന്തു (20) എന്നിവരാണ് പിടിയിലായത്.