യാത്രയയപ്പ് കഴിഞ്ഞ ശേഷം നവീന് ബാബു തന്നെ കാണാനെത്തി…പറഞ്ഞത്…
കണ്ണൂര് എഡിഎം നവീന് ബാബുവിന്റെ മരണവുമായി ബന്ധപ്പെട്ട് കണ്ണൂര് ജില്ലാ കളക്ടര് അരുണ് കെ വിജയന് നല്കിയ മൊഴിയുടെ വിശദാംശങ്ങള് പുറത്ത്. യാത്രയയപ്പ് ചടങ്ങിന് ശേഷം എഡിഎം തന്നെ കാണാനെത്തിയെന്നും തെറ്റുപറ്റിയെന്ന് നവീന് ബാബു പറഞ്ഞെന്നും കളക്ടര് മൊഴി നല്കിയെന്നാണ് വിവരം. എന്നാല് തെറ്റ് എന്ന് നവീന് ഉദ്ദേശിച്ചത് എന്താകാമെന്ന് കളക്ടര് വ്യക്തമാക്കിയിട്ടില്ല. കളക്ടറുടെ മൊഴി നവീന് അഴിമതി നടത്തിയെന്നതിന് തെളിവായി കാണാനാകില്ലെന്നാണ് പ്രാഥമിക നിഗമനം. കണ്ണൂര് ജില്ലാ പ്രസിഡന്റ് പി പി ദിവ്യയുടെ മുന്കൂര് ജാമ്യാപേക്ഷ പരിഗണിക്കുന്ന വേളയിലാണ് മൊഴിയുടെ വിശദാംശങ്ങള് പുറത്തുവന്നത്.
