ഭൂമിക്ക് അരികിലേക്ക് കുതിച്ചു കൊണ്ടിരിക്കുന്നത്… അപകടകരമായ ഛിന്നഗ്രഹം… 335 മീറ്റർ വ്യാസം..
ഭൂമിക്ക് അരികിലേക്ക് കുതിച്ചു കൊണ്ടിരിക്കുന്നത് ആയിരക്കണക്കിന് അണുബോംബുകളുടെ പ്രഹരശേഷിയുള്ള ഛിന്നഗ്രഹം. ഏകദേശം 335 മീറ്റർ വ്യാസം കണക്കാക്കുന്ന ഈ ഭീമൻ ഛിന്നഗ്രഹത്തിൻറെ പേര് Asteroid 2003 MH4 എന്നാണ്. അടുക്കിവച്ചിരിക്കുന്ന മൂന്ന് ഫുട്ബോൾ മൈതാനങ്ങളുടെ നീളം വരുന്ന 2003 എംഎച്ച്4 ഛിന്നഗ്രഹം മെയ് 24-ാം തീയതി ഭൂമിക്ക് അരികിലൂടെ കന്നുപോകും എന്നാണ് അറിയിപ്പ്. മണിക്കൂറിൽ ഏകദേശം 50,000 കിലോമീറ്റർ വേഗത്തിലാണ് ഈ ഛിന്നഗ്രഹത്തിൻറെ സഞ്ചാരം. മുംബൈയിൽ നിന്ന് ദില്ലിയിൽ എത്താൻ ഈ ഛിന്നഗ്രഹത്തിന് ഒരു മിനിറ്റ് പോലും വേണ്ട. 2003 എംഎച്ച്4 ഛിന്നഗ്രഹം സെക്കൻഡിൽ 14 കിലോമീറ്റർ എന്ന അതിവേഗത്തിലാണ് സഞ്ചരിക്കുന്നത്.
ഭൂമിയിൽ യാതൊരു പ്രത്യാഘാതവും സൃഷ്ടിക്കാതെ സുരക്ഷിത അകലത്തിലൂടെ ഛിന്നഗ്രഹം കടന്നുപോകുമെങ്കിലും അതിൻറെ വലിപ്പവും ആഘാതശേഷിയുമാണ് നാസ അടക്കമുള്ള ബഹിരാകാശ ഏജൻസികളുടെ ശ്രദ്ധ പിടിച്ചുപറ്റാൻ കാരണം. നാസയുടെ നീയർ-എർത്ത് ഒബ്‌ജക്റ്റ് സ്റ്റഡീസ് Asteroid 2003 MH4 ഛിന്നഗ്രഹത്തിൻറെ സഞ്ചാരപാത നിരീക്ഷിച്ചുവരികയാണ്. മെയ് 24-ാം തിയതി ഭൂമിക്ക് ഏറ്റവും അടുത്തെത്തുമ്പോൾ പോലും 2003 MH4 ഛിന്നഗ്രഹവും നമ്മുടെ ഗ്രഹവും തമ്മിൽ 6.68 ദശലക്ഷം കിലോമീറ്ററുകളുടെ അകലമുണ്ടായിരിക്കും എന്നാണ് നാസ കണക്കുകൂട്ടുന്നത്.
ഭൂമിക്ക് 7.5 ദശലക്ഷം കിലോമീറ്റർ വരെ അടുത്തുവരുന്ന 150 മീറ്ററിലധികം വലിപ്പമുള്ള അപകടകരമായ ഛിന്നഗ്രഹങ്ങളുടെ പട്ടികയിലാണ് Asteroid 2003 MH4-ൻറെ സ്ഥാനം. 2003 എംഎച്ച്4 ഛിന്നഗ്രഹം നിലവിൽ സുരക്ഷിതമായ അകലത്തിലാണ് സഞ്ചരിച്ചുകൊണ്ടിരിക്കുന്നതെങ്കിലും ഗുരുത്വാകർഷണമോ മറ്റെന്തെങ്കിലും പ്രതിഭാസമോ മൂലം ഏതെങ്കിലും വിധത്തിൽ സഞ്ചാരപാതയിൽ വ്യതിയാനം ഉണ്ടായാൽ, ഭൂമിക്ക് അപകടകരമാകും എന്നതിനാണ് ഈ ഛിന്നഗ്രഹത്തെ ബഹിരാകാശ ഏജൻസികൾ വിടാതെ പിന്തുടരുന്നത്. ഈ ഛിന്നഗ്രഹത്തിൻറെ രൂപവും ഗാഢതയും നിരീക്ഷണ ഘടകങ്ങളിലുണ്ട്.
ഭൂമിയുടെ ഭ്രമണപഥം മുറിച്ചുകടക്കുന്ന അപ്പോളോ ആസ്‌ട്രോയ്ഡ് സംഘത്തിലാണ് Asteroid 2003 MH4-ൻറെ സ്ഥാനം. ഇക്കൂട്ടത്തിലെ ഛിന്നഗ്രഹങ്ങൾ ചിലപ്പോൾ ഭൂമിക്ക് വളരെ അടുത്ത് എത്തിയേക്കാം. 2003 എംഎച്ച്4 ഛിന്നഗ്രഹം നിലവിൽ ഭൂമിക്ക് യാതൊരു ഭീഷണിയുമല്ലെങ്കിലും പ്ലാനറ്ററി ഡിഫൻസ് രംഗത്തിൻറെ പ്രധാന്യം ലോകത്തെ ഓർമ്മിപ്പിക്കുന്നതാണ്. ഇത്രയേറെ വലിപ്പമുള്ള ഛിന്നഗ്രഹങ്ങൾക്ക് ആയിരക്കണക്കിന് ആറ്റംബോംബുകളുടെയെങ്കിലും സംഹാരശേഷിയുണ്ട്. ഇവയുടെ കൂട്ടിയിടി വലിയ അഗ്നിബാധയ്ക്കും ഭൂമികുലുക്കത്തിനും സുനാമിക്കും വരെ കാരണമായേക്കാവുന്നതാണ്.
