മാവേലിക്കര തെക്കേക്കരയിൽ കോൺഗ്രസ് വിമതർ മത്സര രംഗത്ത്

മാവേലിക്കര: പത്രിക പിൻവലിക്കാനുള്ള സമയ പരിധി കഴിഞ്ഞിട്ടും തെക്കേക്കരയിൽ കോൺഗ്രസ് വിമതർ മത്സര രംഗത്ത് തന്നെ. പഞ്ചായത്തിലെ 16 വാർഡുകളിലും മത്സരിക്കുമെന്ന് പ്രഖ്യാപിച്ചെങ്കിലും സമവായത്തിലൂടെ ചില സ്ഥാനാർത്ഥികളെ ഒഴിവാക്കാൻ കോൺഗ്രസ് നേതൃത്വത്തിന് സാധിച്ചിരുന്നു. എന്നാൽ ഡി.സി.സി ജനറൽ സെക്രട്ടറി അടക്കമുള്ളവർ സ്വതന്ത്രരായി മത്സര രംഗത്ത് തുടരുകയാണ്.

പഞ്ചായത്ത് തിരഞ്ഞെടുപ്പിൽ തെക്കേക്കര വാർഡ് ഒന്നിൽ മഹിളാ കോൺഗ്രസ് വെസ്റ്റ് മണ്ഡലം പ്രസിഡന്റ് ഇന്ദിരാ രാജുവും വാർഡ് രണ്ടിൽ മുൻ പഞ്ചായത്ത് മെമ്പറും മഹിളാ കോൺഗ്രസ്സ് ഈസ്റ്റ് മണ്ഡലം പ്രസിഡന്റുമായ രാജമ്മ അജയകുമാറും വാർഡ് മൂന്നിൽ ഡി.സി.സി ജനറൽ സെക്രട്ടറിയും നിലവിൽ പഞ്ചായത്ത് മെമ്പറുമായ എം.കെ.സുധീറും വാർഡ് 16ൽ മുൻ പഞ്ചായത്ത് മെമ്പറായ സുജിത ബിനോജും സ്വതന്ത്രരായി മത്സരിക്കുന്നുണ്ട്. കോൺഗ്രസ് മണ്ഡലം പ്രസിഡന്റ് തിരഞ്ഞെടുപ്പുമായി ബന്ധപ്പെട്ട് മാസങ്ങളായി നിലനിൽക്കുന്ന അസ്വാരസ്യങ്ങൾ ബ്ലോക്ക് കോൺഗ്രസ് നേതൃത്വത്തിന് പരിഹരിക്കാൻ കഴിയാതിരുന്നതാണ് ഇപ്പോൾ കോൺഗ്രസിന് വിനയായിരിക്കുന്നത്. സമവയത്തിലൂടെ സ്വതന്ത്രരായി മത്സരിക്കാൻ തീരുമാനിച്ചിരുന്ന ചിലരെ ഒഴിവാക്കാൻ കഴിഞ്ഞെങ്കിലും ഇവർ ഇപ്പോളും പാർട്ടി നിലപാടിനോട് എതർപ്പ് ഉള്ളവരാണ്. ഇത് തിരഞ്ഞെടുപ്പിൽ പ്രതികൂലമായി ബാധിക്കാൻ സാധ്യതയുണ്ട്.