ഇൻസ്റ്റാഗ്രാം പേജിൽ കമന്റ് ഇട്ടതിനെച്ചൊല്ലി തർക്കം.. ക്രിസ്മസ് പരീക്ഷയ്ക്കെത്തി… സ്കൂളിന് മുന്നിൽ കിടന്ന് കുപ്പിച്ചില്ലുകളും ട്യൂബ് ലൈറ്റുകളും ആയുധമാക്കി തമ്മിൽ തല്ലി
പാലക്കാട് വിദ്യാർത്ഥികൾ തമ്മിൽ കൂട്ടത്തല്ല്. സ്കൂളിൽ ക്രിസ്മസ് പരീക്ഷയ്ക്കെത്തിയ വിദ്യാർത്ഥികളാണ് തമ്മിലടിച്ചത്. കുമരനെല്ലൂർ ഗവൺമെന്റ് ഹൈസ്കൂളിലെ കുട്ടികളാണ് സ്കൂളിൽ കിടന്ന് തല്ലുണ്ടാക്കിയത്. ഇന്ന് ഉച്ചയ്ക്കായിരുന്നു സംഭവം. ഈ സ്കൂളിലെ പത്താം ക്ലാസ്, പ്ലസ് വൺ വിദ്യാർത്ഥികളാണ് തമ്മിൽ തല്ലിയത്. സംഭവത്തിന്റെ ദൃശ്യങ്ങൾ പുറത്ത് വന്നിട്ടുണ്ട്.
ഇരുകൂട്ടർക്കും സ്വന്തമായി ഇൻസ്റ്റാഗ്രാം പേജുകളുണ്ട്. ഇതിൽ കമന്റ് ഇട്ടതിനെച്ചൊല്ലിയുള്ള തർക്കം പിന്നീട് കൂട്ടത്തല്ലിൽ കലാശിക്കുകയായിരുന്നു. ക്രിസ്മസ് പരീക്ഷ കഴിഞ്ഞിറങ്ങിയ വിദ്യാർത്ഥികളും പരീക്ഷ എഴുതാൻ വന്ന വിദ്യാർത്ഥികളും തമ്മിലാണ് തല്ലുണ്ടയാത്.
ഇതിനിടയിൽ സമീപത്തുണ്ടായിരുന്ന കുപ്പിച്ചില്ലുകളും ട്യൂബ് ലൈറ്റുകളും ആയുധമാക്കി വിദ്യാർത്ഥികൾ പരസ്പരം പരിക്കേൽപ്പിച്ചിട്ടുണ്ടെന്നാണ് റിപ്പോർട്ട്. സംഭവത്തിൽ നിരവധി വിദ്യാർത്ഥികൾക്ക് പരിക്കേറ്റിട്ടുണ്ട്. വിദ്യാർത്ഥികൾ കൂട്ടം ചേർന്ന് അക്രമം അഴിച്ച് വിടുകയായിരുന്നു. തുടർന്ന് പൊലീസ് എത്തുന്നതിന് മുൻപ് അധ്യാപകരും നാട്ടുകാരും മറ്റ് വിദ്യാർത്ഥികളും ചേർന്ന് ഇവരെ പിന്തിരിപ്പിച്ചു. സംഭവത്തിൽ അന്വേഷണം നടത്തുമെന്ന് പൊലീസ് അറിയിച്ചു.
