പിറന്നാൾ കേക്ക് മുറിക്കാനെന്ന പേരിൽ വിളിച്ചുവരുത്തി, ഉറ്റസുഹൃത്തിനെ തീകൊളുത്തി കൊലപ്പെടുത്താൻ ശ്രമിച്ച് സുഹൃത്തുക്കൾ

ഉറ്റസുഹൃത്തിനെ പെട്രോളൊഴിച്ച് തീ കൊളുത്തി കൊലപ്പെടുത്താൻ ശ്രമിച്ച് സുഹൃത്തുക്കൾ. മുംബൈയിലെ കുർളയിൽ ആരുന്നു സംഭവം. ജന്മദിനം ആഘോഷിക്കാനെന്ന പേരിൽ സുഹൃത്തിനെ വിളിച്ച് വരുത്തുകയും അഞ്ച് സുഹൃത്തുക്കൾ ചേർന്ന് തീ കൊളുത്തി കൊലപ്പെടുത്താൻ ശ്രമിക്കുകയുമായിരുന്നു. കുർള നിവാസിയായ അബ്ദുൾ റഹ്മാൻ മഖ്‌സൂദ് ആലം ​​ഖാൻ എന്ന 21 വയസുകാരനെയാണ് സുഹൃത്തുക്കൾ കൊല്ലാൻ ശ്രമിച്ചത്. ഗുരുതരമായി പൊള്ളലേറ്റ യുവാവ് കുർളയിലെ ഭാഭ ആശുപത്രിയിൽ ചികിത്സയിൽ കഴിയുകയാണ്. യുവാവിന്റെ മുഖം, മുടി, നെഞ്ച്, കൈകൾ, വലത് കൈപ്പത്തി എന്നിവിടങ്ങളിലാണ് പൊള്ളലേറ്റിട്ടുള്ളത്. താൻ പൊള്ളലേറ്റ് ജീവനുവേണ്ടി ഓടുന്നത് കണ്ട് സുഹൃത്തുക്കൾ ആസ്വദിച്ചുവെന്നാണ് യുവാവ് പോലീസിന് മൊഴി നൽകി. സംഭവത്തിൽ യുവാവിന്റെ സുഹൃത്തുക്കളായ അഞ്ച് പേർക്കെതിരെ പോലീസ് കേസെടുത്തു. അയാസ് മാലിക്, അഷ്‌റഫ് മാലിക്, ഖാസിം ചൗധരി, ഹുസൈഫ ഖാൻ, ഷെരീഫ് ഷെയ്ഖ് എന്നിവർക്കെതിരെയാണ് പോലീസ് കേസെടുത്തിട്ടുള്ളത്.

തിങ്കളാഴ്ച രാത്രി എട്ട് മണിയോടെയാണ് കേസിനാസ്പദമായ സംഭവുമുണ്ടായത്. പിറന്നാൾ കേക്ക് മുറിക്കാനെന്ന പേരിലാണ് യുവാവിനെ സുഹൃത്തുക്കൾ വിളിച്ച് വരുത്തിയത്. യുവാവ് കേക്ക് മുറിക്കാൻ തുടങ്ങിയതോടെയാണ് സുഹൃത്തുക്കൾ തങ്ങളുടെ ക്രൂരതകൾ ആരംഭിച്ചത്. ആരംഭിച്ചത്. ആദ്യം തമാശയെന്നവണ്ണം ചെറിയ കല്ലുകൾ യുവാവിന്റെ ദേഹത്തേക്ക് എറിയാൻ തുടങ്ങി. പിന്നാലെ സുഹൃത്തുക്കളിലൊരാൾ യുവാവിന് നേർക്ക് കുപ്പിയിൽ കൊണ്ട് വന്ന പെട്രോൾ ഒഴിക്കുകയായിരുന്നു.

പെട്രോളിന്റെ മണം മനസിലായ 21കാരൻ എന്താണ് ചെയ്യുന്നതെന്ന് ചോദിച്ചപ്പോഴേയ്ക്കും സുഹൃത്തുക്കൾ യുവാവിന് തീയിടുകയായിരുന്നു. വസ്ത്രത്തിൽ തീ പിടിച്ചതോടെ യുവാവ് രക്ഷയ്ക്കായി ഓടുകയായിരുന്നു. അടുത്ത കെട്ടിടത്തിലേക്ക് തീ പിടിച്ച നിലയിൽ എത്തിയ യുവാവ് കെട്ടിടത്തിലെ സെക്യൂരിറ്റിയുടെ സഹായത്തോടെ ശരീരത്തിലെ തീ അണയ്ക്കുകയായിരുന്നു. സംഭവത്തിന് പിന്നാലെ സുഹൃത്തുക്കൾ സ്ഥലത്ത് നിന്ന് രക്ഷപ്പെട്ടിരുന്നു. സമീപത്തെ കെ‍ട്ടിടത്തിൽ തളർന്ന് നിലത്തിരുന്ന യുവാവിനെ അക്രമി സംഘത്തിലുണ്ടായിരുന്ന ഒരു സുഹൃത്ത് തന്നെയാണ് പിന്നീട് ആശുപത്രിയിൽ എത്തിച്ചത്. പൊള്ളലേറ്റ യുവാവ് ചികിത്സയിൽ തുടരുകയാണ്.

പ്രതികളായ അഞ്ച് അംഗ സംഘത്തിനെതിരെ ഇന്ത്യൻ ശിക്ഷാ നിയമത്തിലെ (ഐപിസി) സെക്ഷൻ 110 പ്രകാരം കുറ്റകരമായ നരഹത്യയ്ക്കുള്ള ശ്രമം എന്ന കുറ്റത്തിനാണ് കേസെടുത്തിരിക്കുന്നത്. അയാസ് ആണ് യുവാവിന്റെ മേൽ പെട്രോൾ ഒഴിച്ചത്. അഷ്റഫ് എന്ന യുവാവാണ് ലൈറ്റർ ഉപയോഗിച്ച് യുവാവിന് തീയിട്ടത്. തീ അണഞ്ഞ ശേഷം ഹുസൈഫ തിരിച്ചെത്തിയാണ് യുവാവിനെ ആശുപത്രിയിലാക്കിയത്. മുംബൈയില ഗുരുനാനാക് ഖൽസ കോളേജിലെ രണ്ടാം വർഷ അക്കൗണ്ടിംഗ് ആൻഡ് ഫിനാൻസ് ബിരുദ വിദ്യാർഥിയാണ് 21കാരൻ.