‘നരിവേട്ട’ സിനിമയ്‌ക്കെതിരെ സികെ ജാനു
ടൊവിനോ തോമസ് നായകനായ നരിവേട്ടയ്‌ക്കെതിരെ സികെ ജാനു . അനുരാജ് മനോഹർ ആയിരുന്നു സിനിമയുടെ സംവിധാനം. ബോക്‌സ് ഓഫീസിൽ വലിയ വിജയം നേടാനായില്ലെങ്കിലും ചിത്രത്തിന്റെ പ്രമേയം ചർച്ചയായിരുന്നു. മുത്തങ്ങ ഭൂസമരത്തെ അടിസ്ഥാനമാക്കിയാണ് ചിത്രമൊരുക്കിയത്. എന്നാൽ ആദിവാസികളുടെ ചരിത്രത്തെ നരിവേട്ടയിൽ അവതരിപ്പിച്ചിരിക്കുന്നത് തെറ്റായ രീതിയിലാണെന്നാണ് സികെ ജാനു പറയുന്നത്.
മനോരമ ഹോർത്തൂസിൽ സംസാരിക്കുകയായിരുന്നു സികെ ജാനു. നടന്ന സംഭവങ്ങളെ മാറ്റി, ഇപ്പോഴത്തെ ആളുകളുടെ ആശയമാണ് സിനിമയിൽ കാണിച്ചിരിക്കുന്നതെന്നാണ് സികെ ജാനു പറയുന്നത്. യഥാർത്ഥ സംഭവങ്ങൾ കാണിക്കാൻ തന്റേടമില്ലാത്തവർ സിനിമ പിടിക്കാൻ പാടില്ലെന്നും സികെ ജാനു തുറന്നടിക്കുന്നു.
‘തന്റേടമില്ലാത്തവർ ഈ സിനിമ പിടിക്കാൻ പാടില്ല. അത് തന്റേടമുള്ളവർ മാത്രമേ ചെയ്യാൻ പാടുള്ളൂ. പൊലീസിനെയും സർക്കാരിനെയും സംരക്ഷിക്കാൻ വേറെ വഴി നോക്കിക്കോണം. കോടതിയിലടക്കം ഇതിനെതിരെ പോകാൻ നോക്കിയതാണ് ഞങ്ങൾ. ഇനിയെങ്കിലും ആദിവാസികളുടെ ചരിത്രത്തെ വളച്ചൊടിക്കരുത്” സികെ ജാനു പറയുന്നു.
”സിനിമയിൽ ഇങ്ങനെ കൊണ്ടുവന്നത് വളരെ മോശമായിപ്പോയി. കാശുണ്ടാക്കാൻ വേണ്ടി ഇപ്പോഴും ആദിവാസികളെ ഉപയോഗിക്കുകയാണ്. ഒരു മാടമ്പി മനോഭാവമാണ് ഇവർക്കുള്ളത്. ആദിവാസികളല്ലാത്ത ഏതെങ്കിലും ഒരു വിഭാഗത്തിന്റെ സമരത്തെ പറ്റി ഇങ്ങനെ സിനിമ എടുക്കുമോ?” എന്നും സികെ ജാനു തുറന്നടിച്ചു.
അബിൻ ജോസഫ് എഴുതി അനുരാജ് മനോഹർ സംവിധാനം ചെയ്ത ചിത്രമാണ് നരിവേട്ട. ടൊവിനോയ്‌ക്കൊപ്പം സുരാജ് വെഞ്ഞാറമൂട്, ചേരൻ, പ്രിയംവദ കൃഷ്ണൻ തുടങ്ങിയവരും പ്രധാന വേഷങ്ങളിലെത്തി.
