വണ്ണം കുറയ്ക്കാന്‍ മാത്രമല്ല.. ചിയ സീഡ് വാട്ടര്‍ ശീലമാക്കിയാൽ ഗുണങ്ങൾ ഏറെ…
ചിയാ സീഡിൽ ധാരാളം പോഷകഗുണങ്ങൾ അടങ്ങിയിരിക്കുന്നു. നാരുകളും കാത്സ്യവും സിങ്കും ഇരുമ്പും മറ്റ് ആന്റി ഓക്‌സിഡന്റുകളും ധാരാളമടങ്ങിയ ഇവ ശരീരത്തിന്റെ മൊത്തത്തിലുള്ള ആരോഗ്യത്തിന് ഗുണം ചെയ്യും.സ്മൂത്തികളിലും യോഗര്‍ട്ടിലും ചേര്‍ത്ത് പ്രഭാത ഭക്ഷണത്തിനൊപ്പമാണ് പലരും ചിയ സീഡ് കഴിക്കാറുള്ളത്. എന്നാല്‍ പ്രഭാതത്തില്‍ കഴിക്കുന്നതിന് പകരം രാത്രിയില്‍ ചിയ സീഡ് വാട്ടര്‍ കഴിക്കുന്നത് കുറേക്കൂടി ഗുണകരമാണ്.ചിയാ സീഡ് കുതിർത്ത വെള്ളം കുടിക്കുന്നത് ശരീരത്തിലെ അധിക കൊഴുപ്പ് കുറയ്ക്കുന്നതിന് സഹായിക്കുന്നതായി ആരോഗ്യ വിദഗ്ധർ പറയുന്നു. ചിയാ വിത്തുകൾ ഭക്ഷണത്തിൽ ഉൾപ്പെടുത്തുന്നത് സുരക്ഷിതവും ആരോഗ്യകരവുമാണ്.
ദഹനം, ഹൈഡ്രേഷന്‍ എന്നിവയുള്‍പ്പെടെ ശരീരം മെച്ചപ്പെടുന്നതിനായി രാത്രിയില്‍ ചിയ സീഡ് ചേര്‍ത്ത വെള്ളം കുടിക്കുന്നത് സഹായിക്കും. നേരത്തേ പറഞ്ഞതുപോലെ ഫൈബര്‍ സമ്പുഷ്ടമാണ് ചിയ സീഡ്. ഇത് വെള്ളത്തില്‍ കുതിരുന്നതോടെ ജെല്‍ രൂപത്തിലേക്ക് മാറും. രാത്രിയില്‍ ഇത് കുടിക്കുന്നത് ദഹനം മെച്ചപ്പെടുത്തുകയും കുടല്‍ ആരോഗ്യത്തോടെയിരിക്കുന്നതിനും ബവല്‍ മൂവ്‌മെന്റുകള്‍ മെച്ചപ്പെടുത്തുന്നതിനും സഹായിക്കും. മലബന്ധം തടയുകയും വയര്‍വീര്‍ക്കുന്നത് ഇല്ലാതാക്കുകയും ചെയ്യും.
ഭാരം കുറയ്ക്കാനും ചിയ സീഡ് പ്രധാന മാര്‍ഗമാണ്.കിടക്കുന്നതിന് മുന്‍പ് ചിയ സീഡ് ചേര്‍ത്ത വെള്ളം കുടിക്കുന്നത് നല്ല ശീലമാണ്. ഫൈബര്‍ അടങ്ങിയിരിക്കുന്നതിനാല്‍ അര്‍ധരാത്രിയിലുള്ള വിശപ്പെല്ലാം ഒഴിവാക്കുന്നതിന് ഇത് സഹായിക്കും. അമിതമായി ഭക്ഷണം കഴിക്കുന്നതും തടയും. രക്തത്തിലെ പഞ്ചാസാരയുടെ അളവ് ക്രമീകരിക്കുന്നതിനും ഇത് സഹായിക്കും.
ചിയ സീഡില്‍ ട്രിപ്‌റ്റോഫന്‍ അടങ്ങിയിരിക്കുന്നു. ഒരുതരം അമിനോ ആസിഡാണ് ഇത്. സെറോടോണിന്‍, മെലാടോണിന്‍ എന്നിവ ഉല്പാദിപ്പിക്കാന്‍ ഇത് ശരീരത്തെ സഹായിക്കുന്നു. ഇവ രണ്ടും നല്ല ഉറക്കം പ്രദാനം ചെയ്യുന്നതാണ്. ഉറക്കക്കുറവ് അനുഭവിക്കുന്ന വ്യക്തിയാണ് നിങ്ങളെങ്കില്‍ ഉറങ്ങും മുന്‍പ് ചിയ സീഡ് ചേര്‍ത്ത വെള്ളം കുടിക്കുന്നത് നല്ലതാണ്.
കൂടാതെ വെള്ളത്തില്‍ കുതിര്‍ക്കുന്ന ചിയ സീഡിന് അവയുടെ ഭാരത്തിന്റെ പത്തിരട്ടി വെള്ളം ആഗിരണം ചെയ്യാന്‍ സാധിക്കുന്നു. ഇത് അവയെ ജലാംശം മെച്ചപ്പെടുത്തുന്നതിനുള്ള മികച്ച ഉപാധിയാക്കി മാറ്റും. രാത്രിമുഴുവന്‍ ശരീരത്തില്‍ ജലാംശം നിലനിര്‍ത്തുന്നതിനും ചിയ സീഡ് ചേര്‍ത്ത വെള്ളം രാത്രി കിടക്കും മുന്‍പ് കുടിക്കുന്നത് സഹായിക്കും. നിര്‍ജലീകരണം മൂലമുണ്ടാകുന്ന തലവേദനയോ, തളര്‍ച്ചയോ ഉറങ്ങി എണീക്കുമ്പോള്‍ ഉണ്ടാകില്ല. ചര്‍മത്തിന്റെ ആരോഗ്യത്തിനും ഇത് ഗുണം ചെയ്യും. ചര്‍മം ഈര്‍പ്പവും തിളക്കവുമുള്ളതായി ഇത് നിലനിര്‍ത്തും
