അമ്പലപ്പുഴയിൽ യുവാവിനെ കുത്തിയും വെട്ടിയും കൊലപ്പെടുത്തിയ കേസ്; ഒന്നാം പ്രതിയ്ക്ക് ജീവപര്യന്തം കഠിന തടവും ഒരു ലക്ഷം രൂപാ പിഴയും

അമ്പലപ്പുഴ: യുവാവിനെ കുത്തിയും വെട്ടിയും കൊലപ്പെടുത്തിയ കേസിൽ ഒന്നാം പ്രതിയ്ക്ക് ജീവപര്യന്തം കഠിന തടവും ഒരു ലക്ഷം രൂപാ പിഴയും ശിക്ഷ വിധിച്ചു. ആലപ്പുഴ നോർത്ത് പോലീസ് സബ്ബ് ഇൻസപെക്ടർ ആയിരുന്ന കെ.എസ്- മോഹൻദാസ് രജിസ്റ്റർ ചെയ്ത കേസ്സിൽ ആലപ്പുഴ അഡീഷണൽ ജില്ലാ സെഷൻസ് കോതി 3 ജഡ്ജി എം. ഷുഹൈബ് ആണ് വിധി പ്രസ്താവിച്ചത്.

ആലപ്പുഴ സെൻ്റ് മേരീസ് സ്കൂളിന് വടക്ക് വശം കലിങ്കിൽ ഇരിക്കുകയായിരുന്ന ആലപ്പുഴ കനാൽ വാർഡിൽ ചക്കംപറമ്പ് വീട്ടിൽ ഇർഷാദി (19) നെ മുൻ വൈരാഗ്യത്തിൻ്റെ പേരിൽ പ്രതികൾ മാരകായുധങ്ങളുമായി സംഘം ചേർന്ന് ആക്രമിക്കുകയായിരുന്നു. നെഞ്ചിൽ ഗുരുതരമായി കുത്തേറ്റ ഇർഷാദ് ആശുപത്രിയിൽ വെച്ച് മരണപ്പെട്ടു. കൂടെ പരിക്കേറ്റ ജോസ് ആൻ്റണിയുടെ മൊഴിയാണ് കേസ്സിൽ വഴിത്തിരിവായത്. പ്ലസ് ടു കഴിഞ്ഞ് വെൽഡിങ് ജോലിയ്ക്ക് പോകുകയായിരുന്നു കൊല്ലപ്പെട്ട ഇർഷാദ്. ഏഴ് പ്രതികൾ ഉണ്ടായിരുന്ന കേസ്സിൽ 5പ്രതികൾ മൈനർമാരായതിനാൽ ചേർത്തല ജുവൈനൽ ജസ്റ്റീസ് കോടതിയിൽ പ്രതികളുടെ വിചാരണാ നടപടികൾ നടക്കും. ഈ കേസ്സിൽ 4-ാം പ്രതിയായ മുജീബ് കബയെ കുറ്റക്കാരല്ലെന്ന് കണ്ടെത്തി വെറുതെവിട്ടു.

ശിക്ഷിക്കപ്പെട്ട ഒന്നാം പ്രതി സനാതനം വാർഡിൽ വെളിം പറമ്പ് വയസ്സുള്ള മാഹിൻ (35)നെ ജയിലിലേക്ക് അയച്ചു. കേസ്സിൽ പ്രോസിക്യൂഷന് വേണ്ടി അഡീഷണൽ ഗവ: പ്ലീഡർ ആൻ്റ് പബ്ലിക് പ്രോസിക്യൂട്ടർ ശാരി എൻ.സി ഹാജരായിരുന്നു. സീനിയർ സിവിൽ പോലീസ് ഓഫീസർ കെ.ജെ. ജോർജ്,സിവിൽ പോലീസ് ഓഫീസർ അമൽ സി. എന്നിവർ വിചാരണ നടപടികൾ ഏകോപിപ്പിച്ചു. അന്വേഷണം പൂർത്തിയാക്കി പ്രതികൾക്കെതിരെ കുറ്റപത്രം ഹാജരാക്കിയത് നോർത്ത് പോലീസ് സ്റ്റേഷൻ ഐ.എസ്.എച്ച്.ഒ ആയിരുന്ന ഇൻസ്പെക്ടർ കെ.എ. തോമസായിരുന്നു.