ബിജെപി സ്ഥാനാർത്ഥിയായി ‘സോണിയാ ഗാന്ധി’.. കോൺഗ്രസിനും സിപിഎമ്മിനും നെഞ്ചിടിപ്പ്…
മൂന്നാറിൽ ബിജെപിക്ക് വേണ്ടി കളത്തിലിറങ്ങി സോണിയാ ഗാന്ധിയും.മൂന്നാർ പഞ്ചായത്തിലെ 16-ാം വാർഡ് നല്ലതണ്ണിയിലാണ് ബിജെപി സ്ഥാനാർത്ഥിയായി സോണിയാ ഗാന്ധി മത്സരിക്കുന്നത്. ബിജെപി പഞ്ചായത്ത് ജനറൽ സെക്രട്ടറി സുഭാഷിന്റെ ഭാര്യയാണ് സോണിയ.നല്ലതണ്ണി കല്ലാറിലെ മുതിർന്ന കോൺഗ്രസ് നേതാവ് പരേതനായ ദുരെരാജിന്റെ മകളാണ് സോണിയ ഗാന്ധി. കോൺഗ്രസ് നേതാവ് സോണിയ ഗാന്ധിയോടുള്ള ഇഷ്ടംകൊണ്ടാണ് അദ്ദേഹം മകൾക്ക് ഈ പേരിട്ടത്.
എന്നാൽ, ബിജെപി പ്രവർത്തകനായ സുഭാഷിനെ വിവാഹം ചെയ്തതോടെ സോണിയ ബിജെപി അനുഭാവിയായി. ഇത്തവണ സോണിയക്ക് മത്സരിക്കാനുള്ള സീറ്റും ലഭിച്ചു. കോൺഗ്രസിലെ മഞ്ജുള രമേശും സിപിഎമ്മിലെ വലർമതിയുമാണ് സോണിയ ഗാന്ധിയുടെ എതിർ സ്ഥാനാർത്ഥികൾ. നല്ലതണ്ണിയിൽ സോണിയാ ഗാന്ധി കോൺഗ്രസിനെ തോൽപ്പിക്കുമോ എന്നാണ് ഉറ്റുനോക്കുന്നത്.
