വെട്ടിച്ചിറ ടോൾ പ്ലാസയിൽ അപകടം…. ബസിന്റെ ജനലിലൂടെ കൈ പുറത്തിട്ടു…. അമ്മയ്ക്കും കുഞ്ഞിനും ഗുരുതര പരിക്ക്

മലപ്പുറം: വെട്ടിച്ചിറ ടോൾ പ്ലാസയിൽ ബസ് യാത്രക്കാരായ അമ്മയ്ക്കും കുഞ്ഞിനും നേരെ ദാരുണമായ അപകടം. ടോൾ പ്ലാസയിലെ തൂണിൽ കൈ തട്ടി ഇരുവരുടെയും കൈകൾക്ക് ഗുരുതരമായി പരിക്കേറ്റു. കോതമംഗലത്ത് നിന്ന് വയനാട്ടിലേക്ക് വിവാഹ ചടങ്ങിൽ പങ്കെടുക്കാൻ പോവുകയായിരുന്ന കുടുംബമാണ് അപകടത്തിൽപ്പെട്ടത്.

യാത്രയ്ക്കിടെ ബസ് ടോൾ പ്ലാസയിലേക്ക് പ്രവേശിച്ച സമയത്താണ് അപകടം സംഭവിച്ചത്. ബസിനുള്ളിലിരുന്ന അമ്മയും കുട്ടിയും അബദ്ധത്തിൽ കൈ പുറത്തേക്കിടുകയായിരുന്നു. ടോൾ പ്ലാസയുടെ ഇടുങ്ങിയ പാതയിലൂടെ ബസ് നീങ്ങിയപ്പോൾ പാർശ്വഭാഗത്തുള്ള കോൺക്രീറ്റ് തൂണിൽ കൈകൾ ശക്തമായി ഇടിക്കുകയായിരുന്നു. കോതമംഗലത്ത് നിന്നും വയനാട്ടിലേക്ക് ബന്ധുവിന്റെ കല്യാണത്തിൽ പങ്കെടുക്കാനായി പോകുന്നതിനിടെയായിരുന്നു സംഭവം.

അപകടം നടന്ന ഉടൻ തന്നെ ഇരുവരെയും പ്രാഥമിക ചികിത്സ നൽകിയ ശേഷം കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. ഇരുവരും നിലവിൽ തീവ്രപരിചരണ വിഭാഗത്തിൽ ചികിത്സയിലാണ്. യാത്രക്കാർ ബസിനുള്ളിൽ ഇരിക്കുമ്പോൾ കൈകൾ പുറത്തിടരുതെന്ന കർശന നിർദ്ദേശങ്ങൾ നിലനിൽക്കെയാണ് ഇത്തരം അപകടങ്ങൾ ആവർത്തിക്കുന്നത്. ടോൾ പ്ലാസകളിലെ ഇടുങ്ങിയ ട്രാക്കുകളിലൂടെ വലിയ വാഹനങ്ങൾ കടന്നുപോകുമ്പോൾ യാത്രക്കാർ അതീവ ജാഗ്രത പാലിക്കണമെന്ന് അധികൃതർ വീണ്ടും ഓർമ്മിപ്പിച്ചു.