ഡ്രൈവിങ് ലൈസൻസ് ലേണേഴ്സ് പരീക്ഷയിൽ കൂട്ടത്തോൽവി; ‘കാപ്ച’ സമ്പ്രദായം അപേക്ഷകരെ വലയ്ക്കുന്നു
ആലപ്പുഴ: ഡ്രൈവിങ് ലൈസൻസ് നേടുന്നതിനുള്ള ആദ്യഘട്ടമായ ലേണേഴ്സ് പരീക്ഷയുടെ ഓൺലൈൻ ടെസ്റ്റിൽ വിജയിക്കുന്നവരുടെ എണ്ണം ഗണ്യമായി കുറഞ്ഞു. ചോദ്യപേപ്പറിലും പരീക്ഷാ രീതിയിലും വരുത്തിയ പുതിയ പരിഷ്കാരങ്ങളാണ് ഈ കൂട്ടത്തോൽവിക്ക് പ്രധാന കാരണമെന്ന് അപേക്ഷകർ പരാതിപ്പെടുന്നു.
പഴയ രീതിയിൽ 20 ചോദ്യങ്ങൾ ഉണ്ടായിരുന്ന സ്ഥാനത്ത് ഇപ്പോൾ 30 ചോദ്യങ്ങളാണ് പരീക്ഷയ്ക്ക് നൽകുന്നത്. ഇതിൽ കുറഞ്ഞത് 18 എണ്ണത്തിന് ശരിയുത്തരം നൽകിയാൽ മാത്രമേ ഒരാൾക്ക് വിജയിക്കാൻ സാധിക്കൂ.
പരീക്ഷയെഴുതുന്നവർക്ക് ഏറ്റവും വലിയ വെല്ലുവിളിയാകുന്നത് ഉത്തരങ്ങൾ കാപ്ച (CAPTCHA) രൂപത്തിൽ ടൈപ്പ് ചെയ്ത് നൽകേണ്ട ചോദ്യങ്ങളാണ്. ഓരോ മൂന്ന് സാധാരണ ചോദ്യങ്ങൾക്ക് ശേഷവും, അടുത്ത ചോദ്യത്തിന്റെ ഉത്തരം കാപ്ച രൂപത്തിൽ നൽകേണ്ടിവരും.
കംപ്യൂട്ടർ ടൈപ്പിങ്ങിൽ വേഗത കുറവുള്ളവർക്കും വേണ്ടത്ര സാങ്കേതിക പരിജ്ഞാനം ഇല്ലാത്തവർക്കും ഇത് കൂടുതൽ സമയമെടുക്കാൻ കാരണമാകുന്നു. സാധാരണ ചോദ്യങ്ങൾക്ക് 30 സെക്കൻഡും കാപ്ച ഉത്തരമായി നൽകേണ്ട ചോദ്യങ്ങൾക്ക് 45 സെക്കൻഡുമാണ് അനുവദിച്ചിട്ടുള്ള സമയം.
പരീക്ഷയെഴുതുന്നവരിൽ ഏകദേശം 80 ശതമാനം പേർക്കും നിശ്ചിത സമയപരിധിക്കുള്ളിൽ ടെസ്റ്റ് പൂർത്തിയാക്കാൻ സാധിക്കുന്നില്ലെന്നാണ് പ്രധാന പരാതി. ഇംഗ്ലീഷിലെ ചെറിയ അക്ഷരങ്ങൾ, വലിയ അക്ഷരങ്ങൾ, അക്കങ്ങൾ എന്നിവ ഉൾപ്പെടുന്നതാണ് കാപ്ച കോഡ്. 30 ചോദ്യങ്ങളുള്ള ഒരു പരീക്ഷയിൽ ആകെ ഒൻപത് തവണ കാപ്ച ഉത്തരം നൽകേണ്ടി വരും.
പരീക്ഷയിൽ തോറ്റാൽ വീണ്ടും അപേക്ഷ സമർപ്പിക്കണം. ലേണേഴ്സ് പരീക്ഷയ്ക്ക് തീയതി ലഭിക്കാൻ നിലവിൽ തന്നെ ദിവസങ്ങൾ കാത്തിരിക്കണം. ഇത് വിജയിച്ചാൽ മാത്രമേ ഡ്രൈവിങ് ടെസ്റ്റിന് ഹാജരാകാൻ സാധിക്കൂ.
പലതവണ പരീക്ഷ എഴുതിയാൽ മാത്രമേ ലേണേഴ്സ് ലൈസൻസ് ലഭിക്കൂ എന്ന സ്ഥിതിയിലാണ് പല അപേക്ഷകരും. ടെസ്റ്റ് തീയതികൾക്കായി മാസങ്ങൾ കാത്തിരിക്കേണ്ടിവരുന്നത് ജോലിക്ക് പോകുന്നവരെയും വിദ്യാർത്ഥികളെയും ഏറെ ബുദ്ധിമുട്ടിലാക്കുന്നു. ഒന്നിലധികം തവണ ടെസ്റ്റിന് ഹാജരാകേണ്ടിവരുന്നത് കാരണം കൂടുതൽ അവധി എടുക്കേണ്ട സ്ഥിതിയും ഉണ്ടാകുന്നു.
ഉത്തരേന്ത്യൻ സംസ്ഥാനങ്ങളിൽ ഏജന്റുമാർ വ്യാജ ലേണേഴ്സ് സർട്ടിഫിക്കറ്റുകൾ നൽകിയിരുന്നതായി കണ്ടെത്തിയിരുന്നു. ഈ തട്ടിപ്പുകൾ തടയാനും സുരക്ഷ ഉറപ്പാക്കാനുമായിട്ടാണ് നാഷണൽ ഇൻഫർമാറ്റിക് സെന്റർ (എൻഐസി) ടെസ്റ്റിനിടെ കാപ്ച ഉൾപ്പെടുത്തിയതെന്ന് അധികൃതർ അറിയിച്ചു.
