വട്ടമ്പലത്ത് 5 ഗർഭിണികളായ ആടുകളെ കൊന്നു; ആക്രമണത്തിന് പിന്നിൽ..

പാലക്കാട് ജില്ലയിലെ കുമരംപുത്തൂർ വട്ടമ്പലത്ത് അജ്ഞാത ജീവിയുടെ ആക്രമണത്തിൽ അഞ്ച് ഗർഭിണികളായ ആടുകൾ ചത്തു. വട്ടമ്പലം പാലാത്ത് സ്വദേശി ദേവസ്യാച്ചന്റെ വീട്ടിലാണ് സംഭവം നടന്നത്. ഏകദേശം ഒന്നര ലക്ഷം രൂപയുടെ നഷ്ടം കണക്കാക്കുന്നു.

കഴിഞ്ഞ ബുധനാഴ്ച രാത്രിയാണ് സംഭവം നടന്നത്. ആക്രമണം നടക്കുമ്പോൾ വീട്ടിൽ ആളുകൾ ഉണ്ടായിരുന്നില്ല. അഞ്ച് ആടുകളിൽ ഒന്നിന്റെ തലയൊഴിച്ചുള്ള ബാക്കി ഭാഗങ്ങൾ ജീവി ഭക്ഷിച്ച നിലയിലായിരുന്നു. മറ്റ് നാല് ആടുകളെയും കടിച്ചുകൊന്ന നിലയിൽ കണ്ടെത്തുകയായിരുന്നു. ചത്ത അഞ്ച് ആടുകളും ഗർഭിണികളായിരുന്നു.

ആക്രമണത്തെക്കുറിച്ച് വനംവകുപ്പും നാട്ടുകാരും രണ്ട് അഭിപ്രായമാണ് പങ്കുവെക്കുന്നത്. സ്ഥലത്തെത്തി പരിശോധന നടത്തിയ വനംവകുപ്പ് ഉദ്യോഗസ്ഥർ ഇത് തെരുവുനായ്ക്കളുടെ ആക്രമണമാണെന്നാണ് പ്രാഥമികമായി അറിയിച്ചത്. എന്നാൽ, പ്രദേശവാസികൾക്ക് ഈ നിഗമനത്തിൽ സംശയമുണ്ട്. ആടുകളെ കൊന്നത് കുറുനരിയോ അല്ലെങ്കിൽ ചെന്നായ പോലുള്ള വന്യമൃഗങ്ങളോ ആകാനാണ് സാധ്യതയെന്ന് അവർ അഭിപ്രായപ്പെടുന്നു. ആക്രമണത്തിന്റെ സ്വഭാവം കണക്കിലെടുത്താണ് നാട്ടുകാർ ഈ സംശയം ഉന്നയിക്കുന്നത്.

ദേവസ്യാച്ചന്റെ പരാതിയുടെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്തിട്ടുണ്ട്. ചത്ത ആടുകളുടെ പോസ്റ്റ്‌മോർട്ടം നടപടികൾ പൂർത്തിയാക്കി സംസ്കരിച്ചു.