ആറളം ഫാമിലെത്തി ശശീന്ദ്രൻ…പ്രതിഷേധം അവസാനിപ്പിച്ചു…

ആറളത്ത് ദമ്പതിമാരെ കാട്ടാന കൊലപ്പെടുത്തിയ സംഭവത്തിൽ മണിക്കൂറുകളായി തുടർന്ന പ്രതിഷേധം അവസാനിപ്പിച്ചു. വനം മന്ത്രി എ.കെ.ശശീന്ദ്രൻ ​ആറളം ഫാമിലെത്തി നാട്ടുകാരോട് നേരിട്ട് സംസാരിച്ചതിന് പിന്നാലെയാണ് പ്രതിഷേധം അവസാനിപ്പിച്ചത്.നിങ്ങളെപോലെ പച്ച മനുഷ്യനാണ് താനെന്നും നിങ്ങൾക്കുള്ളതുപോലെ ആ വേദന താനും പങ്കുവെയ്ക്കുകയാണെന്നും ശശീന്ദ്രൻ പറഞ്ഞു.ആറളം പഞ്ചായത്ത് ഓഫീസിൽ ചേർന്ന സർവ്വകക്ഷി യോ​ഗത്തിനു ശേഷമായിരുന്നു മന്ത്രി നാട്ടുകാരെ കണ്ടത്.

മരിച്ചവരുടെ കുടുംബത്തിന്റെ താൽപര്യമനുസരിച്ച് മൃതദേഹങ്ങൾ സംസ്കരിക്കേണ്ടതുണ്ട്. ഇങ്ങനെയൊരു അനുഭവം ഈ നാട്ടുകാർക്ക് ഇനി ഉണ്ടാകാൻ പാടില്ല. അതിന് വളരെ ആസൂത്രിതമായ പദ്ധതികളും പ്രവർത്തനങ്ങളുമാണ് ആവശ്യമെന്നും മന്ത്രി കൂട്ടിച്ചേർത്തു. വനം മന്ത്രി നേരിട്ടെത്തിയാൽ മാത്രമേ മൃതദേഹങ്ങൾ സംസ്കരിക്കൂ എന്നായിരുന്നു പ്രതിഷേധക്കാരുടെ നിലപാട്.