സഹപ്രവർത്തകരെ കൊലപ്പെടുത്തിയ ജവാന് ജീവപര്യന്തം…
അതീവ സുരക്ഷയുള്ള മിലിട്ടറി സ്റ്റേഷനിൽ നാല് സഹപ്രവർത്തകരെ കൊലപ്പെടുത്തിയ ജവാന് ജീവപര്യന്തം തടവുശിക്ഷ. ദേശായി മോഹൻ എന്ന സൈനികനാണ് ജനറൽ കോർട്ട് മാർഷൽ ജീവപര്യന്തം തടവുശിക്ഷയും സർവീസിൽ നിന്ന് പിരിച്ചുവിടാനും വിധിച്ചത്.
2023 ഏപ്രിൽ 12നായിരുന്നു ബതിൻഡ മിലിട്ടറി സ്റ്റേഷനിൽ കേസിനാസ്പദമായ സംഭവം.80 മീഡിയം ആർട്ടിലറി റെജിമെൻ്റിലെ സാഗർ ബാനെ, കംലേഷ് ആർ, സന്തോഷ് നഗരാൽ, യോഗേഷ്കുമാർ എന്നിവരെയാണ് ദേശായി മോഹൻ വെടിവച്ച് കൊന്നത്. സംഭവത്തിൽ ദേശായ്ക്കെതിരെ ആർമി ആക്ട് 69, 52 (എ), ഐ.പി.സി 302 എന്നീ വകുപ്പുകൾ ചുമത്തിയാണ് കേസെടുത്തതെന്ന് ഉദ്യോഗസ്ഥർ പറഞ്ഞു.ഓഫീസർമാരുടെ മെസ്സിനു സമീപം മുറിയിൽ ഉറങ്ങവെയാണ് നാല് സഹപ്രവർത്തകരെ ദേശായി വെടിവച്ചു കൊന്നത്.സിവിൽ പൊലീസ് നടത്തിയ അന്വേഷണത്തിൽ, കൊല്ലപ്പെട്ടവർ തന്നെ ലൈംഗികമായി ചൂഷണം ചെയ്തിരുന്നതായി ആന്ധ്രാപ്രദേശ് സ്വദേശിയായ പ്രതി ആരോപിച്ചിരുന്നു. നാല് പേരും തൻ്റെ പ്രതിശ്രുത വധുവിനോട് മൊബൈലിൽ സംസാരിക്കുകയും അവളുടെ ഫോട്ടോകൾ എടുക്കുകയും പരിഹസിക്കുകയും ചെയ്യാറുണ്ടായിരുന്നെന്നും ദേശായി പറഞ്ഞിരുന്നു.ഇതിന്റെ വൈരാഗ്യമാണ് കൊലക്ക് പിന്നിൽ.
