ഭീതി പടർത്തി ചന്ദിപുര വൈറസ്; കൂടുതൽ പേർക്ക് രോഗം സ്ഥിരീകരിച്ചു…

ഗാന്ധിനഗർ∙ ഗുജറാത്തിൽ 7 പേർക്ക് കൂടി ചന്ദിപുര വൈറസ് (സിഎച്ച്പിവി) സ്ഥിരീകരിച്ചു. ഇതോടെ സംസ്ഥാനത്ത് രോഗം സ്ഥിരീകരിച്ചവരുടെ എണ്ണം 58 ആയി. സംസ്ഥാനത്ത് വൈറസ് ബാധിച്ച് ഇതുവരെ 20 പേരുടെ മരണപ്പെട്ടുവെന്നാണ് റിപ്പോർട്ട്.

കഴിഞ്ഞ ദിവസം സബർകാന്ത, ആരവല്ലി, പഞ്ച്മഹൽ, മോർബി, വഡോദര ജില്ലകളിൽ ഓരോരുത്തർക്കും മെഹ്‌സാനയിൽ രണ്ട് പേർക്കുമാണ് വൈറസ് ബാധ സ്ഥിരീകരിച്ചത്. ജൂലൈ ഒന്നിനാണ് ചന്ദിപുര വൈറസ് ഗുജറാത്തിൽ ആദ്യം സ്ഥിരീകരിച്ചത്.

ചന്ദിപുര വൈറസിന് ഇന്ത്യയില്‍ കണ്ടുവരുന്ന തീവ്ര മസ്‌തിഷ്‌കവീക്കവുമായും ബന്ധമുണ്ട്.
പ്രധാനമായും കുട്ടികളെ ബാധിക്കുന്ന വൈറസ് അണുവാഹകരായ സാൻഡ് ഫ്ലൈ കടിക്കുന്നതിലൂടെയാണ്‌ മനുഷ്യരിലേക്ക് പടരുന്നതെന്നാണ് നിഗമനം.

9 മാസം മുതല്‍ 14 വയസ്സ്‌ വരെയുള്ള കുട്ടികളെയാണ് രോഗം കൂടുതലായും ബാധിക്കുന്നത്. ചന്ദിപുര വെസിക്കുലോവൈറസ്‌ (സിഎച്ച്‌പിവി) എന്ന പേരില്‍ അറിയപ്പെടുന്ന ഈ ആര്‍എന്‍എ വൈറസ്‌, പേവിഷബാധയുണ്ടാക്കുന്ന റാബിസ്‌ വൈറസിന്റെ കുടുംബമായ റാബ്‌ഡോവിറിഡയില്‍ ഉള്‍പ്പെടുന്നതാണ്.
1965 ലാണ്‌ ഈ വൈറസ്‌ ആദ്യമായി മഹാരാഷ്ട്രയിലെ ചന്ദിപുര ഗ്രാമത്തിലാണ് കണ്ടെത്തിയത്‌.