5000 കോടി നല്‍കാമെന്ന് കേന്ദ്രം..

സാമ്പത്തിക പ്രതിസന്ധിയിൽ വലയുന്ന കേരളത്തിനു 5,000 കോടി രൂപ നൽകാമെന്നു കേന്ദ്ര സർക്കാർ. അടുത്ത സാമ്പത്തിക വർഷത്തെ കടമെടുപ്പ് പരിധിയിലെ തുക ഉടൻ നൽകാമെന്ന് കേന്ദ്രം വ്യക്തമാക്കി. എന്നാൽ 10,000 കോടിയെങ്കിലും വേണം എന്നാണ് സംസ്ഥാന സർക്കാരിന്റെ ആവശ്യം. മറ്റു സംസ്ഥാനങ്ങൾക്കൊന്നും നൽകാത്ത ഇളവുകളാണ് കേരളത്തിനു നൽകുന്നതെന്ന് കേന്ദ്രം ഓർമിപ്പിച്ചു. മറ്റുള്ളവരും ആവശ്യപ്പെട്ടെങ്കിലും മാനദണ്ഡങ്ങൾക്കു വിരുദ്ധമായി ആർക്കും ഒന്നും കൊടുത്തിട്ടില്ലെന്നും കേന്ദ്രം പറഞ്ഞു. 5,000 കോടി ഒന്നുമാകില്ലെന്നും 10,000 കോടിയെങ്കിലും കിട്ടണമെന്നും സംസ്ഥാന സർക്കാരിനു വേണ്ടി ഹാജരായ കപിൽ സിബൽ ആവശ്യപ്പെട്ടു. 5,000 കോടി വാങ്ങിക്കൂടേയെന്നു കോടതി കേരളത്തോടു ചോദിച്ചെങ്കിലും വേണ്ടെന്നു സംസ്ഥാന സർക്കാർ നിലപാടെടുത്തു. ഇതോടെ അടുത്ത വ്യാഴാഴ്ച കേസിൽ വാദം കേൾക്കാമെന്ന് കോടതി അറിയിച്ചു.