സംസ്ഥാന കോണ്‍ഗ്രസില്‍ കെ സി വേണുഗോപാലിനെതിരെ പടയൊരുക്കം.. എ, ഐ ഗ്രൂപ്പുകള്‍ കൈകോര്‍ക്കുന്നു…
സംസ്ഥാന കോണ്‍ഗ്രസില്‍ എഐസിസി ജനറൽ സെക്രട്ടറി കെ സി വേണുഗോപാലിനെതിരെ പടയൊരുക്കം. കെ സിയ്‌ക്കെതിരെ എ, ഐ ഗ്രൂപ്പുകള്‍ കൈകോർക്കാൻ നീക്കം നടക്കുന്നതായാണ് റിപ്പോര്‍ട്ട്. കെ സി വേണുഗോപാല്‍ സംസ്ഥാനത്ത് സജീവമാകാന്‍ തയ്യാറെടുക്കുന്നതിനിടെയാണ് ഗ്രൂപ്പുകളുടെ നീക്കം. വിശാല ഐ ഗ്രൂപ്പ് പുനരുജ്ജീവിപ്പിക്കാനാണ് മുതിർന്ന നേതാവ് രമേശ് ചെന്നിത്തലയുടെ ശ്രമം. പിണങ്ങി നില്‍ക്കുന്നവരെ ഒപ്പം നിര്‍ത്താനും ശ്രമം തുടങ്ങി.
എ ഗ്രൂപ്പും കടുത്ത അമര്‍ഷത്തിലാണ്. പരമ്പരാഗതമായി ലഭിച്ച പദവികളെല്ലാം നഷ്ടമായെന്നും എ ഗ്രൂപ്പിനെ പൂര്‍ണമായും തഴയുകയാണെന്നുമാണ് പരാതി. ഉമ്മന്‍ചാണ്ടിക്കൊപ്പം നിന്നവരെ അവഗണിക്കുന്നുവെന്നാണ് എ ഗ്രൂപ്പിന്റെ ആരോപണം. നിയമസഭാ തിരഞ്ഞെടുപ്പിന് മുൻപ് സംസ്ഥാനത്ത് സജീവമാകാനാണ് കെ സി വേണുഗോപാലിന്‍റെ നീക്കം. ഇതിനെ തടയിടാനുള്ള കരുനീക്കത്തിലാണ് എ, ഐ ഗ്രൂപ്പുകൾ.
