സ്വര്‍ണവില സര്‍വകാല റെക്കോര്‍ഡിലേക്ക്…
സംസ്ഥാനത്ത് ഇന്ന് സ്വര്‍ണവില സര്‍വകാല റെക്കോര്‍ഡിലേക്ക്. ചരിത്രത്തിലാദ്യമായി സ്വർണവില അമ്പതിനായിരം രൂപ കടന്നു. ഒരു പവൻ സ്വർണത്തിന് 50,400 രൂപ ആണ് നിലവിലെ വില. ഒരു ഗ്രാമിന് 6,300 രൂപ ആയി. രാജ്യാന്തര വിപണിയിലെ വിലവർധനവാണ് കേരളത്തിലും വില കൂടാൻ കാരണം. ഈ മാസത്തിന്റെ തുടക്കത്തില്‍ 46,320 രൂപയായിരുന്നു സ്വര്‍ണവില. മൂന്നാഴ്ചയ്ക്കിടെ 3000 രൂപയിലധികം വര്‍ധിച്ച് സ്വർണവില 21ന് 49,440 രൂപയായി ഉയര്‍ന്നു. തുടര്‍ന്നുള്ള ദിവസങ്ങളില്‍ വില താഴ്ന്ന് 49,000ല്‍ താഴെ എത്തിയ ശേഷം വീണ്ടും ഉയരുകയായിരുന്നു.
