വീട്ടിൽ അതിക്രമിച്ച് കയറിയ അയൽവാസി വീട്ടമ്മയുടെ ദേഹം കറിക്കത്തി കൊണ്ട് മുറിച്ചു…

കോട്ടയത്ത് വീട്ടിൽ അതിക്രമിച്ച് കയറി അയൽവാസി നടത്തിയ ആക്രമണത്തിൽ വീട്ടമ്മക്ക് ശരീരമാസകലം പരുക്ക് .വൈക്കം നഗരസഭ എട്ടാം വാർഡിൽ മഠത്തിൽ പറമ്പിൽ ഗിരിജ (62)യെയാണ് അയൽവാസിയായ കിഴക്കേമഠത്തിൽ അപ്പു (52) കത്തി ഉപയോഗിച്ച് പരിക്കേൽപ്പിച്ചത്. ഇരു വീട്ടുകാരും തമ്മിലുള്ള കലഹത്തെ തുട‍ര്‍ന്നായിരുന്നു ആക്രമണമെന്നാണ് വിവരം. ഇന്ന് ഉച്ചക്കാണ് ആക്രമണം നടന്നത് .

വീട്ടിൽ അതിക്രമിച്ച് കയറിയ അപ്പു കറിക്കത്തി കൊണ്ട് ഗിരിജയെ തലങ്ങും വിലങ്ങും മുറിക്കുകയായിരുന്നു .ഗിരിജയുടെ തലയ്ക്കും കഴുത്തിനും മുഖത്തും കൈത്തണ്ടയിലുമടക്കം നിരവധി മുറിവുകളേറ്റു. നാട്ടുകാരുടെ സഹായത്തോടെ ഗിരിജയെ വൈക്കം താലൂക്ക് ആശുപത്രിയിലേക്ക് കൊണ്ടുപോയെങ്കിലും പരിക്കുകൾ സാരമുള്ളതായതിനാൽ പിന്നീട് കോട്ടയം മെഡിക്കൽ കോളേജിലേക്ക് മാറ്റി. ഗിരിജയുടെ ആരോഗ്യനില തൃപ്തികരമാണെന്നാണ് വിവരം