വിരട്ടാൻ നോക്കണ്ടാ…പ്രതികരണവുമായി തോമസ് ഐസക്….

പത്തനംതിട്ട: മസാല ബോണ്ട് ഇടപാടിലെ നിയമസാധുത പരിശോധിക്കണമെങ്കില്‍ തോമസ് ഐസക്കിന്‍റെ മൊഴിയെടുക്കല്‍ അനിവാര്യമെന്നാണ് ഇഡി ഇന്ന് ഹൈക്കോടതിയില്‍ അറിയിച്ചതിന് പിന്നാലെ പ്രതികരണവുമായി തോമസ് ഐസക്. വിരട്ടാൻ നോക്കണ്ടായെന്നും പൗരന്‍റെ അവകാശങ്ങള്‍ക്ക് വേണ്ടിയാണ് താൻ പോരാടുന്നതെന്നും തോമസ് ഐസക് പറഞ്ഞു. എന്ത് തെറ്റാണ് താൻ ചെയ്തതെന്ന് പറയട്ടെ. വിരട്ടാമെന്ന് വിചാരിക്കണ്ട. നിയമ പോരാട്ടം തുടരും.

ഡൽഹിയിൽ ഇരിക്കുന്ന ആരുടെയെങ്കിലും ആഗ്രഹം കാരണമാകും തന്‍റെ പിന്നാലെ ഇഡി വരുന്നതെന്നും തോമസ് ഐസക് ആരോപിച്ചു. പത്തനംതിട്ടയിലെ കയ്യാങ്കളിയുമായി ബന്ധപ്പെട്ടും തോമസ് ഐസക് പ്രതികരിച്ചു. ഇല്ലാത്ത കാര്യങ്ങൾ ഉണ്ടാക്കണ്ടെന്നും രണ്ടു പേരും പത്രസമ്മേളനം നടത്തി കാര്യങ്ങൾ വിശദീകരിച്ചു കഴിഞ്ഞുവെന്നും പാർട്ടിയിൽ ഒരു തർക്കവുമില്ലെന്നും തോമസ് ഐസക് പറഞ്ഞു. സുഗമമായി പ്രചാരണം നടക്കുകയാണെന്നും പാർട്ടിയിൽ ഒന്നും സംഭവിച്ചിട്ടില്ലെന്നും ഐസക് പറഞ്ഞു.