ലോറി തടഞ്ഞ് സിനിമാ സ്റ്റൈലിൽ പോത്തുകളെയും മൂരികളെയും കവർന്നു..രണ്ട് പേർ പിടിയിൽ…

പാലക്കാട്: വടക്കഞ്ചേരി ദേശീയപാതയില്‍ ലോറി തടഞ്ഞ് പോത്തുകളെ മോഷ്ടിച്ചു. കാറിലും ജീപ്പിലും ബൈക്കിലുമായി എത്തിയ സംഘമാണ് 50 പോത്തുകളെയും 27 മൂരികളെയും കവർന്നത്.സംഭവവുമായി ബന്ധപ്പെട്ട് രണ്ട് പേർ പോലീസ് പിടിയിലായി. ചീരക്കുഴി സ്വദേശികളായ ഷമീർ, ഷജീർ എന്നിവരാണ് പിടിയിലായത്.

ഇന്നലെ പുലര്‍ച്ചെ നാലുമണിയോടെയായിരുന്നു സംഭവം.ആന്ധ്രയില്‍ നിന്നും ഉരുക്കളുമായി കോട്ടയത്തേക്ക് പോകുകയായിരുന്നു ലോറി. കോട്ടയം കുറവിലങ്ങാട് സ്വദേശി ജോബിയുടേതായിരുന്നു ഉരുക്കള്‍. ലോറി വടക്കഞ്ചേരിയിലെത്തിയപ്പോൾ കാറിലും ജീപ്പിലും, ബൈക്കിലുമായി എത്തിയ 10 അംഗ സംഘം ലോറി തടഞ്ഞ് നിർത്തി ലോറിയിലുണ്ടായിരുന്നവരെ കാറിലേക്കും ജീപ്പിലേക്കും മാറ്റി.തുടര്‍ന്ന് ലോറിയിലുണ്ടായിരുന്ന പോത്തുകളെയും മൂരികളെയുമായി കടന്നുകളയുകയായിരുന്നു. 4 കിലോമീറ്റർ അപ്പുറത്തുള്ള വേങ്ങശ്ശേരിയിൽ പോത്തുകളെ ഇറക്കി ദേശീയപാതയിൽ ലോറി ഉപേക്ഷിച്ചു.

ലോറിയിലുണ്ടായിരുന്ന ഡ്രൈവറെയും ക്ലീനറെയും 4 മണിക്കൂറോളം വടക്കഞ്ചേരി ടൗണിലൂടെ കറക്കിയ ശേഷം റോഡിൽ ഇറക്കിവിട്ടു.തുടർന്ന് ലോറി ഉടമ നൽകിയ പരാതിയുടെ അടിസ്ഥാനത്തിൽ നടന്ന അന്വേഷണത്തിൽ പൊലീസ് ഉരുക്കളെ കണ്ടെത്തി. . മറ്റ് പ്രതികൾക്കായുള്ള അന്വേഷണം ആരംഭിച്ചു. ഇറച്ചി വിൽപ്പന നടത്തുന്നവരാണ് മോഷണം നടത്തിയത് എന്നാണ് പൊലീസിന് ലഭിച്ച വിവരം.