മുൻ കേന്ദ്രമന്ത്രി ബിരേന്ദർ സിംഗ് വീണ്ടും കോൺഗ്രസിലേക്ക്…
ന്യൂഡല്‍ഹി: ബിജെപി വിട്ട് കോൺഗ്രസിൽ ചേരാനൊരുങ്ങി മുൻ കേന്ദ്രമന്ത്രി ബിരേന്ദർ സിംഗ്. വാർത്താസമ്മേളനത്തിലാണ് ഈ കാര്യം വ്യക്തമാക്കിയത് .ബിരേന്ദറിന്റെ മകനും ഹിസാറില്‍നിന്നുള്ള ലോക്‌സഭാംഗവുമായിരുന്ന ബ്രിജേന്ദ്ര സിങ് ബിജെപി വിട്ട് കോണ്‍ഗ്രസില്‍ ചേര്‍ന്ന് ഒരുമാസത്തിന് ശേഷമാണ് ഈ നീക്കം. ബിജെപിയുടെ പ്രാഥമികാംഗത്വത്തില്‍നിന്ന് രാജിവെച്ചെന്നും രാജിക്കത്ത് പാര്‍ട്ടി ദേശീയ അധ്യക്ഷന്‍ ജെ പി നദ്ദയ്ക്ക് അയച്ചെന്നും ബിരേന്ദര്‍ സിംഗ് അറിയിച്ചു .
ബിരേന്ദറിന്റെ ഭാര്യയും ഹരിയാനയിലെ ബിജെപി എംഎല്‍എയുമായിരുന്ന പ്രേമലതയും പാര്‍ട്ടി വിട്ടിരുന്നു. 2014 മുതല്‍ 2019 വരെയാണ് പ്രേമലത ബിജെപിയുടെ എംഎല്‍എ ആയിരുന്നത്. പ്രേമലതയും താനും നാളെ കോണ്‍ഗ്രസില്‍ ചേരുമെന്നും അദ്ദേഹം കൂട്ടിച്ചേര്‍ത്തു. നാല്‍പ്പത് കൊല്ലത്തോളം കോണ്‍ഗ്രസ് അംഗമായിരുന്ന ബിരേന്ദര്‍ 2014-ലാണ് ബിജെപിയില്‍ ചേര്‍ന്നത്. അന്നത്തെ പാർട്ടി അധ്യക്ഷൻ അമിത് ഷായുടെ സാന്നിധ്യത്തിലാണ് ബിരേന്ദർ സിംഗ് ബിജെപിയിൽ ചേർന്നത്.
