ബേക്കറിക്ക് തീപിടിച്ചു സാധനങ്ങളും ഫർണിച്ചറുകളും പൂര്‍ണമായും കത്തി നശിച്ചു…
കിളിമാനൂർ ജങ്ഷനിൽ ബേക്കറി കത്തി നശിച്ചു.വടകര സ്വദേശി ഇസ്മയിലിന്റെ ഉടമസ്ഥതയിലുള്ള ടോപ്പ് ബേക്കറിയിലാണ് തീപ്പിടുത്തമുണ്ടായത്. ഞായറാഴ്ച രാത്രി 10.30 ഓടെയായിരുന്നു സംഭവം. തീ പടരുന്നതു കണ്ട് വിവരമറിയിച്ചതിനെ തുടർന്ന്വെഞ്ഞാറമൂട് നിലയത്തിൽ നിന്നുള്ള അഗ്നിരക്ഷാ സേനയാണ് തീ നിയന്ത്രണ വിധേയമാക്കിയത്.
താഴെയും മുകളിലുമായി പ്രവർത്തിക്കുന്ന കടയുടെ താഴെ നിന്നും തീ പടർന്ന് മുകളിലേക്കുമെത്തി. സാധനങ്ങളും ഫർണിച്ചറുകളും പൂര്‍ണമായും കത്തി നശിച്ചു. യഥാസമയം തീ കെടുത്തിയതിനാൽ മറ്റിടത്തേക്ക് പടരാതെ വൻ അപകടം ഒഴിവായി.അഞ്ച് ലക്ഷം രൂപയുടെ നഷ്ടമുണ്ടായതായി കണക്കാക്കപ്പെടുന്നു.ഷോട്ട് സര്‍ക്ക്യൂട്ടാണ് കാരണമെന്ന് കരുതുന്നു.
