പ്രണയത്തിൽ നിന്ന് പിന്മാറി..ആലപ്പുഴയിൽ കുത്തേറ്റ യുവതി മരിച്ചു…
ആലപ്പുഴ പൂച്ചാക്കലിൽ കുത്തേറ്റ് ചികിത്സയിലായിരുന്ന യുവതി മരിച്ചു .ചേര്‍ത്തല പാണാവള്ളിയിലെ സ്വകാര്യ കമ്പനിയില്‍ തൊഴിലാളിയായിരുന്ന ഒഡീഷ സ്വദേശിനി റിത്വിക സാഹു (25) ആണ് മരിച്ചത് .കോട്ടയം മെഡിക്കൽ കോളേജിൽ ചികിത്സയിലായിരുന്നു .സംഭവത്തിൽ ഒഡീഷ സ്വദേശിയായ സാമുവലിനായി തിരച്ചിൽ ശക്തമാക്കിയിട്ടുണ്ട് .
പ്രണയത്തില്‍നിന്ന് പിന്മാറിയതിന്റെ പകയാണ് ആക്രമണത്തിന് കാരണമെന്ന് പൊലീസ് വ്യക്തമാക്കി . റിത്വികയും സാമുവലും നേരത്തെ അടുപ്പത്തിലായിരുന്നു. എന്നാല്‍, സാമുവലിന് ഭാര്യയും കുട്ടികളുമുള്ള വിവരമറിഞ്ഞതോടെ യുവതി ബന്ധത്തില്‍നിന്ന് പിന്മാറി. ഇതാണ് ആക്രമണത്തില്‍ കലാശിച്ചത്. സംഭവത്തില്‍ പൊലീസ് കേസെടുത്തിട്ടുണ്ടെങ്കിലും സാമുവലിനെ പിടികൂടാനായിട്ടില്ല. പ്രതിക്കായി തിരച്ചിൽ പുരോഗമിക്കുകയാണെന്ന് പൊലീസ് അറിയിച്ചു.
