കൊല്ലത്ത് കാർ കത്തിയ സംഭവം..മരിച്ചയാളെ തിരിച്ചറിഞ്ഞു….

കൊല്ലം ചാത്തന്നൂരിൽ കാർ കത്തി മരിച്ചയാളെ തിരിച്ചറിഞ്ഞു. കല്ലുവാതുക്കൽ പാറയിൽ സ്വദേശി ജൈനു ( 58 ) ആണ് മരിച്ചത്. തെളിവുകളും ശാസ്ത്രീയ പരിശോധനകളും അടിസ്ഥാനമാക്കിയാണ് മരിച്ചയാളെ തിരിച്ചറിഞ്ഞത്.ആത്മഹത്യയാണെന്നാണ് പൊലീസിന്‍റെ പ്രഥമിക നിഗമനം. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി. ഇന്നലെ വൈകിട്ടാണ് നിർമ്മാണം നടക്കുന്ന ദേശീയ പാതയിൽ കാർ കത്തിയത്. ചാത്തന്നൂർ കുരിശുമ്മൂട് സ്പിന്നിംഗ് മില്ലിന് സമീപം വൈകിട്ട് ഏഴു മണിയോടെയായിരുന്നു സംഭവം.

പാരിപ്പള്ളി ഭാഗത്തുനിന്ന് വന്ന കാർ നിർമാണത്തിലിരിക്കുന്ന ദേശീയ പാതയിൽ നിർത്തിയിട്ടു. നിമിഷനേരം കൊണ്ട് കാറിനുള്ളിൽ നിന്ന് തീ പടരുകയായിരുന്നു. ദേഹത്തും കാറിലും പെട്രോൾ ഒഴിച്ച് കത്തിച്ചതാകാമെന്നാണ് പ്രാഥമിക നിഗമനം. കാർ പൂർണമായും കത്തിയതിനാൽ വിശദമായ പരിശോധനയ്ക്ക് ശേഷമേ ഇക്കാര്യം സ്ഥിരീകരിക്കാനാകൂ. കുടുംബ പ്രശ്നങ്ങളാണോ മരണ കാരണമെന്ന് അന്വേഷിക്കുന്നുണ്ട്.