ഒട്ടേറെ ക്രിമിനല്‍ കേസുകളില്‍ പ്രതി.. മാവേലിക്കരയില്‍ യുവാവ് കുത്തേറ്റ് മരിച്ച സംഭവത്തിൽ പ്രതിക്കായി തിരച്ചില്‍…
മാവേലിക്കര: മുള്ളിക്കുളങ്ങരയില്‍ സുഹൃത്തുക്കള്‍ തമ്മിലുണ്ടായ തര്‍ക്കത്തിനിടെ ഒരാള്‍ കുത്തേറ്റ് മരിച്ച സംഭവത്തിൽ പ്രതിക്കായി പോലീസ് തിരച്ചില്‍. ഉമ്പര്‍നാട് ചക്കാലകിഴക്കേതില്‍ സജേഷ്(37) ആണ് മരിച്ചത്.
സജേഷിനെ കുത്തി കൊലപ്പെടുത്തിയ പ്രതി ഉമ്പര്‍നാട് സ്വദേശി വിനോദ്(വെട്ടുകത്തി വിനോദ്) ഒളിവിലാണ്. ഇയാള്‍ക്കായാണ് പോലീസ് തിരച്ചില്‍ നടത്തുന്നത്.
ഇന്നലെ രാത്രി മുള്ളിക്കുളങ്ങര അശ്വതി ജങ്ഷനില്‍വെച്ചാണ് സുഹൃത്തുക്കളായ യുവാക്കള്‍ മദ്യപിച്ച് തര്‍ക്കമുണ്ടാക്കിയത്. ഇതിനിടെ വിനോദ് സജേഷിന്റെ ഇടതുകൈയില്‍ കുത്തിപരിക്കേല്‍പ്പിക്കുകയായിരുന്നു. ഉടന്‍തന്നെ ആശുപത്രിയില്‍ എത്തിച്ചെങ്കിലും രക്തംവാര്‍ന്ന് മരണംസംഭവിച്ചിരുന്നു. കൊല്ലപ്പെട്ട സജേഷ് പെയിന്റിങ് തൊഴിലാളിയാണ്. സജേഷിനെ കുത്തിയ വെട്ടുകത്തി വിനോദ് നേരത്തെയും ഒട്ടേറെ ക്രിമിനല്‍ കേസുകളില്‍ പ്രതിയാണെന്നാണ് പോലീസ് നല്‍കുന്നവിവരം.
