എ.ഐ.സി.സി തലത്തില്‍ പുതുമുഖങ്ങള്‍… മുന്നേറ്റമുണ്ടാക്കാത്ത കോണ്‍ഗ്രസ് സംസ്ഥാന അദ്ധ്യക്ഷന്‍മാരെ മാറ്റുന്നു….
ലോക്സഭാ തിരഞ്ഞെടുപ്പ് ഫലം പുറത്ത് വന്നതിന് പിന്നാലെ കോൺഗ്രസിന്റെ ദേശീയ നേതൃത്വത്തിലും സംസ്ഥാന നേതൃത്വത്തിലും മാറ്റങ്ങൾക്ക് ഒരുങ്ങി കോൺഗ്രസ് ദേശീയ അധ്യക്ഷൻ മല്ലികാർജുൻ ഖർഗെ. കഴിഞ്ഞ പൊതുതിരഞ്ഞെടുപ്പിൽ മികച്ച വിജയം നേടാൻ വിവിധ സംസ്ഥാനങ്ങളിൽ മുന്നിൽ നിന്ന പുതുമുഖങ്ങളെ നേതൃത്വങ്ങളിലേക്ക് കൊണ്ട് വരാനാണ് ശ്രമം. ഭാവിയിൽ വരുന്ന തിരഞ്ഞെടുപ്പുകൾക്ക് പാർട്ടിയെ ശക്തമാക്കുകയാണ് ലക്ഷ്യം.
ഈ മാറ്റത്തിന്റെ ഭാഗമായി പശ്ചിമ ബംഗാൾ, ബിഹാർ, ഹിമാചൽപ്രദേശ്, തെലങ്കാന, കർണ്ണാടക തുടങ്ങി സംസ്ഥാനങ്ങളിൽ പുതിയ പിസിസി അദ്ധ്യക്ഷന്‍മാരെ നിയോഗിക്കുമെന്നാണ് സൂചന. പശ്ചിമ ബംഗാളിൽ ഇതിനകം തന്നെ പാർട്ടിയെ നയിച്ചിരുന്ന അധീർ രഞ്ജൻ ചൗധരി രാജി സ്വമേധയാ രാജിവെച്ചിരുന്നു. കോൺഗ്രസിന്റെ പരമ്പരാഗത സീറ്റായിരുന്ന ബഹാറാംപൂർ മണ്ഡലമടക്കം 42 സീറ്റുകളുള്ള ബംഗാളിൽ പാർട്ടിക്ക് മുന്നേറ്റമുണ്ടാക്കാൻ കഴിയാത്തതിന്റെ ഉത്തരവാദിത്തം ഏറ്റെടുത്തായിരുന്നു ചൗധരിയുടെ രാജി.
