എഴുപത്തിയഞ്ച് കുട്ടി ഗാന്ധിജിമാരുടെ അമൃതയാത്ര

മാവേലിക്കര: സ്വാതന്ത്യത്തിൻ്റെ അമൃതവർഷാചരണത്തിൻ്റെ ഭാഗമായി മാവേലിക്കര വിദ്യാധിരാജാ വിദ്യാപീഠം സെൻട്രൽ സ്കൂൾ വിദ്യാർത്ഥികൾ മാവേലിക്കര നഗരത്തിൽ നടത്തിയ വിളംബര ജാഥ ശ്രദ്ധയാകർഷിച്ചു. മഹാത്മാഗാന്ധിയുടെ വേഷവിധാനത്തിൽ വന്ന എഴുപ്പത്തിയഞ്ച് വിദ്യാർത്ഥികൾ നയിച്ച വിളംബര ജാഥയിൽ എഴുപത്തിയഞ്ച് ആൺകുട്ടികളും എഴുപത്തിയഞ്ച് പെൺകുട്ടികളും സൈക്കിളിൽ യാത്രയ്ക്ക് അകമ്പടി സേവിച്ചു. റോളർ സ്ക്കേറ്റിംഗ്, സ്വാതന്ത്യ സമരവുമായി ബന്ധപ്പെട്ട സംഭവങ്ങളുടെ നിശ്ചല ദൃശ്യങ്ങളും വിളംബര ജാഥയെ കൂടുതൽ ശ്രദ്ധേയമാക്കി. ബുദ്ധ ജംഗ്ഷനിൽ നിന്നും ആരംഭിച്ച അമൃത യാത്ര മാവേലിക്കര സി.ഐ എസ്.ശ്രീജിത്ത് ഫ്ലാഗ് ഓഫ് ചെയ്തു. സ്വാതന്ത്യദിനം വരെയുള്ള ദിവസങ്ങളിൽ വ്യത്യസ്തമായ ആഘോഷ പരിപാടികൾ സംഘടിപ്പിക്കുമെന്ന്യി സ്കൂൾ പ്രിൻസിപ്പാൾ കെ.പി.ഡിൻ്റോ അറിയിച്ചു.