ആലപ്പുഴ ബീച്ചിൽ ഫോട്ടോ എടുക്കുന്നതിനിടെ അമ്മയും ആറുവയസുള്ള കുട്ടിയും തിരയിൽപ്പെട്ടു

ആലപ്പുഴ: കടൽത്തീരത്ത് ഫോട്ടോ എടുക്കുന്നതിനിടെ അമ്മയും ആറുവയസുള്ള കുട്ടി​യും തിരയിൽപ്പെട്ടു. ആലപ്പുഴ ബീച്ചിൽ ഫോട്ടോ എടുക്കുന്നതിനിടെയാണ് അസാം സ്വദേശികളായ അമ്മയും കുഞ്ഞും തിരയിൽപ്പെട്ട് കടലിലേക്ക് ഒഴുകിപ്പോയത്. ഇന്നലെ വൈകിട്ട് 5.45 ഓടെ കടൽപ്പാലത്തിന് വടക്ക് ഭാഗത്തായിരുന്നു അപകടം.

ഭർത്താവിന്റെ കാമറയ്ക്ക് മുന്നിൽ പോസ് ചെയ്യുന്നതിനിടെയാണ് യുവതി​യും കുട്ടി​യും അപ്രതീക്ഷിതമായി​ എത്തിയ കൂറ്റൻ തിരമാലയിൽപ്പെട്ട് പോയത്. കുട്ടിയാണ് ആദ്യം തിരയിൽപ്പെട്ട് കടലിലേക്ക് ഒഴുകിപ്പോയത്. കുഞ്ഞിനെ രക്ഷിക്കാനായി ശ്രമിക്കുന്നതിനിടെയാണ് അമ്മയും തിരയിൽപ്പെട്ട് തീരത്തു നിന്നും 20 മീറ്ററോളം ദൂരത്തേക്ക് ഒഴുകി​പ്പോയത്.

അമ്മയെയും കുഞ്ഞിനെയും ലൈഫ്ഗാർഡ് രക്ഷപ്പെടുത്തി​. അപകടത്തിൽപ്പെട്ടവരെ ലൈഫ്ഗാർഡ് അനിൽകുമാറാണ് കടലിലേക്ക് ചാടി രക്ഷപ്പെടുത്തിയത്. ലൈഫ് ഗാർഡുകളായ ഷിബു, സന്തോഷ്, ബിജു ചാക്കോ എന്നി​വരോടൊപ്പം ഭർത്താവും സഹായത്തി​നെത്തി​. ഇരുവർക്കും കാര്യമായ പരിക്ക് ഏറ്റിട്ടില്ലായിരുന്നു. അപ്രതീക്ഷിതമായുണ്ടായ അപകടത്തിൽ ഭയന്ന അമ്മയും കുട്ടി​യും കുറേ സമയം ബീച്ചിൽ ഇരുന്ന ശേഷമാണ് തിരികെ പോയത്.