അമ്പൂരിയിൽ ഗുണ്ടാ ആക്രമണം നടത്തിയ സംഘത്തിലെ രണ്ടുപേർ പിടിയിൽ….

അമ്പൂരിയിൽ ഗുണ്ടാ ആക്രമണം നടത്തിയ സംഘത്തിലെ രണ്ടുപേർ തമിഴ്‌നാട് അതിർത്തിയിൽ പിടിയിലായി.അമ്പൂരി സ്വദേശികളായ അബിൻ റോയ്(19), അഖിൽ ലാൽ(22) എന്നിവർ കളിയിക്കാവിളയിൽ ഒളിച്ചിരുന്ന സ്ഥലത്തുനിന്ന് രക്ഷപ്പെടാൻ ശ്രമിക്കുന്നതിനിടെ വെള്ളറട പോലീസ് പിടികൂടുകയായിരുന്നു.ചൊവ്വാഴ്ചയാണ് അമ്പൂരിയിൽ ഗുണ്ടാ വിളയാട്ടം അരങ്ങേറിയത്.രാത്രിയുടെ മറവിൽ ലഹരിയിൽ അഴിഞ്ഞാടിയ ഗുണ്ടാസംഘം വഴിയാത്രക്കാരെയും വീടും ആക്രമിച്ചു.
പ്രദേശത്തെ സ്ഥിരം പ്രശ്നക്കാരായ ജിബിനും സംഘവുമാണ് പ്രദേശത്ത് അക്രമ അന്തരീക്ഷം സൃഷ്ടിച്ചത്. ഏതാനും ദിവസങ്ങൾക്ക് മുമ്പ് ജയിൽ മോചിതരായ ഈ സംഘം ഇതുവഴി കടന്നു വന്ന ഇരുചക്ര വാഹനക്കാരെ തടഞ്ഞു നിർത്തി ആക്രമിക്കുകയായിരുന്നു. ആക്രമണത്തിൽ അമ്പൂരി സ്വദേശിയായ പാസ്റ്റർ അരുണിന് വെട്ടേറ്റു. ഇയാളെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അമ്പൂരി കൺസ്യൂമർഫെഡ് ജീവനക്കാരിയായ സരിതയെയും ഭർത്താവിനെയും ​ഗുണ്ടാ സംഘം വെറുതെ വിട്ടില്ല. ഇവരെയും സംഘം ആക്രമിച്ചു. ഇത് ചോദ്യം ചെയ്ത ജയകുമാറിന്റെ വീടിന് നേരെയും ​ഗുണ്ടാ സം​ഘം ആക്രമണം നടത്തി. ജയകുമാറിന്റെ സ്കൂട്ടർ തകർത്ത് ഇതിൽ സൂക്ഷിച്ചിരുന്ന പണവും സംഘം കവർന്നു. നാട്ടുകാർ സംഘടിച്ചപ്പോഴേക്കും സംഘം ഇരുട്ടിലേക്ക് ഓടി മാറി.