സജി യുഡിഎഫിലേക്ക് ഇല്ല..ഇനി ചര്ച്ച വേണ്ടെന്ന് വെച്ച് കോണ്ഗ്രസ്…
കേരള കോണ്ഗ്രസ് ഗ്രൂപ്പ് ജോസഫ് വിഭാഗം ജില്ലാ പ്രസിഡന്റ് സ്ഥാനത്തുനിന്ന് രാജിവെച്ച സജി മഞ്ഞകടമ്പിലിനെ അനുനയിപ്പിക്കാനുള്ള ശ്രമം യുഡിഎഫ് നേതൃത്വം ഉപേക്ഷിച്ചു .യുഡിഎഫ് ജില്ല ചെയര്മന് സ്ഥാനത്തുനിന്നടക്കം രാജിവെച്ച സജി നേതൃത്വത്തിന്റെ അനുനയ നീക്കത്തില് വഴങ്ങിയിരുന്നില്ല. ഇതേതുടര്ന്നാണ് സജിയുമായി ഇനി ചര്ച്ച വേണ്ടെന്ന നിലപാട് നേതൃത്വം സ്വീകരിച്ചത്. മോന്സ് ജോസഫ് ഉള്ളതിനാൽ യുഡിഎഫിലേക്കും കേരള കോൺഗ്രസ്സിലേക്കും മടങ്ങില്ല .മോൻസ് നേതൃത്വം നല്കുന്ന പാര്ട്ടിയില് താന് സുരക്ഷിതനല്ലെന്നും അദ്ദേഹം ആവര്ത്തിച്ചു . രാജി പിന്വലിപ്പിക്കാന് പാര്ട്ടിയുടെയും മുന്നണിയുടെയും നേതാക്കള് ഇടപെട്ടെങ്കിലും വഴങ്ങിയില്ല.
കേരള കോണ്ഗ്രസ് ചെയര്മാന് പി ജെ ജോസഫ് നേരിട്ട് ഇടപെട്ടെങ്കിലും സജി നിലപാട് മാറ്റിയില്ല. തുടര്ന്നാണ് യുഡിഎഫ് ജില്ലാ ചെയര്മാനായി മുതിര്ന്ന നേതാവ് ഇ ജെ അഗസ്തിയെ തെരഞ്ഞെടുത്തത്. ഇനി അനുനയ ശ്രമം വേണ്ടെന്നാണ് ഭൂരിഭാഗം നേതാക്കളുടെയും അഭിപ്രായം. നിര്ണായക ഘട്ടത്തില് പാര്ട്ടിക്കും മുന്നണിക്കും സജി അവമതിപ്പുണ്ടാക്കിയതില് നേതൃത്വത്തിന് അതൃപ്തിയുണ്ട്. എത്ര അഭിപ്രായ വ്യത്യാസം ഉണ്ടെങ്കിലും വികാര പ്രകടനം നടത്തേണ്ട സമയം ഇതായിരുന്നില്ല എന്നാണ് കോണ്ഗ്രസ് നേതൃത്വത്തിന്റെ വിമര്ശനം.
