വന്യജീവികളുടെ നഖങ്ങളും ചന്ദന മരക്കഷണങ്ങളുമായി യുവാവിനെ പിടികൂടി

മാവേലിക്കര: എക്സൈസ് പരിശോധനയിൽ വന്യജീവികളുടെ നഖങ്ങളും ചന്ദന മരക്കഷണങ്ങളുമായി യുവാവിനെ പിടികൂടി. മാവേലിക്കര ചെറുകുന്നം ചെമ്പള്ളി കിഴക്കതിൽ വീട്ടിൽ വിഷ്ണു (27) ആണ് പിടിയിലായത്. ഇയാൾ ലഹരിവസ്തുക്കളുടെ ഉപയോഗവും വിൽപനയും നടത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ മാവേലിക്കര എക്സൈസ് റേഞ്ച് ഇൻസ്പെക്ടർ പി.സിജുവിന്റെ നേതൃത്വത്തിൽ നടത്തിയ പരിശോധനയിലാണ് വന്യജീവികളുടെ തോലോടു കൂടിയ നഖങ്ങളും ചന്ദന മരത്തിന്റെ കഷണങ്ങളും കണ്ടെത്തിയത്. ചാരുംമൂട് സ്വദേശിയായ വിഷ്ണു കഴിഞ്ഞ രണ്ടു വർഷമായി അമ്മയോടൊപ്പം ചെറുകുന്നത്ത് വാടകവീട്ടിലാണ് താമസം. ഒരാഴ്ചയോളം ഇയാൾ എക്സൈസിന്റെ നിരീക്ഷണത്തിലായിരുന്നു. ഇന്ന് രാവിലെ നടത്തിയ മിന്നൽ പരിശോധനയിലാണ് നഖങ്ങളും ചന്ദന മരക്കഷണങ്ങളും കണ്ടെത്തിയത്. കണ്ടെത്തിയ നഖങ്ങളും തോലും പുലിയുടെതാണെന്നും ഇവ ചെങ്ങന്നൂർ ബസ് സ്റ്റാൻഡിന്റെ പരിസരത്തു നിന്നും വാങ്ങിയതാണെന്നും വിഷ്ണുവാണ് എക്സൈസ് ഉദ്യോഗസ്ഥരോട് പറഞ്ഞത്. വിഷ്ണുവിന്റെ മൊഴിയുടെ അടിസ്ഥാനത്തിൽ റാന്നി ഫോറസ്റ്റ് ഓഫീസിൽ വിവരമറിയിച്ചതിനെ തുടർന്ന് വൈകിട്ട് നാല് മണിയോടെ കരികുളം സ്റ്റേഷൻ ഡെപ്യൂട്ടി റേഞ്ച് ഓഫീസർ എസ്.സുധീഷിന്റെ നേതൃത്വത്തിലുള്ള സംഘം സ്ഥലത്തെത്തി നഖങ്ങളും തോലും പരിശോധിച്ചു. പ്രാഥമിക പരിശോധനയിൽ ഇവ പുലിയുടേതല്ലെന്ന് സ്ഥിരീകരിച്ചു. എന്നാൽ കണ്ടെത്തിയ തോലും നഖങ്ങളും വന്യജീവികളുടേതാണെന്ന് സ്ഥിരീകരിച്ചിട്ടുണ്ട്. വിശദമായ പരിശോധനയ്ക്കായി ഇവ തിരുവനന്തപുരത്തെ ലാബിൽ അയക്കുമെന്ന് ഫോറസ്റ്റ് ഉദ്യോഗസ്ഥർ പറഞ്ഞു. വനം വന്യജീവി സംരക്ഷണ നിയമ പ്രകാരം ഇത്തരം വസ്തുക്കൾ കൈവശം വച്ചതിന് വിഷ്ണുവിനെ അറസ്റ്റ് ചെയ്ത് കസ്റ്റഡിയിൽ എടുത്തു. പ്രതിയെ നാളെ റാന്നി മജിസ്ട്രേറ്റ് കോടതിയിൽ ഹാജരാക്കും. സിവിൽ എക്സൈസ് ഓഫീസർമാരായ ഷിബു പി.യു, പ്രവീൺ, അശ്വിൻ എസ്.കെ, പ്രതീഷ് പി.നായർ, വിഷ്ണുദാസ്, സനൽ സിബിരാജ്, ആർ.രണദിവെ, വനിതാ സിവിൽ എക്സൈസ് ഓഫീസർ സുലേഖ, എക്സൈസ് ഡ്രൈവർ ജ്യോതിഷ് എന്നിവരും റാന്നി ഫോറസ്റ്റ് റേഞ്ചിലെ കരികുളം സ്റ്റേഷൻ ബി.എഫ്.ഒ അനീഷ് കുമാർ, ഡബ്ല്യൂ.ബി.എഫ്.ഒ പി.ദേവിക, സജി പി.ആർ എന്നിവരാണ് പരിശോധനയിൽ പങ്കെടുത്തത്.