ജന്മദിനാഘോഷത്തിനായി ക്ഷണിച്ചു… പത്താം ക്ലാസ് വിദ്യാര്‍ത്ഥിനിയെ സഹപാഠിയും സീനിയര്‍ വിദ്യാര്‍ത്ഥികളും കൂട്ടബലാത്സംഗം ചെയ്തു….
പത്താം ക്ലാസ് വിദ്യാര്‍ത്ഥിനിയെ സഹപാഠിയും സീനിയര്‍ വിദ്യാര്‍ത്ഥികളും ചേര്‍ന്ന് ബലാത്സംഗം ചെയ്തു. സീനിയറായ പ്ലസ്ടു വിദ്യാര്‍ത്ഥിയുടെ ജന്മദിനാഘോഷത്തില്‍ പങ്കെടുക്കുന്നതിനായാണ് വിദ്യാര്‍ത്ഥിനി സുഹൃത്തിന്റെ വീട്ടില്‍ എത്തിയത്. തുടർന്ന്, പെണ്‍കുട്ടിയോട് സംസാരിക്കാനായി സഹപാഠിയായ വിദ്യാർത്ഥി വീട്ടിലെ മുറിയ്ക്കുള്ളിലേക്ക് ക്ഷണിക്കുകയായിരുന്നു. പെട്ടന്ന് രണ്ട് സുഹൃത്തുക്കളെ അകത്തേക്ക് വിളിച്ച ശേഷം സഹപാഠി വാതില്‍ അടയ്ക്കുകയായിരുന്നെന്ന് പെണ്‍കുട്ടി പറയുന്നു.
പിന്നീട്, മൂന്ന് പേര്‍ ചേര്‍ന്ന് പെൺകുട്ടിയെ ബലാത്സംഗം ചെയ്യുകയും അത് മൊബൈലില്‍ പകര്‍ത്തുകയുമായിരുന്നു. ഒപ്പം പകര്‍ത്തിയ ദൃശ്യങ്ങൾ അതേ സ്‌കൂളിലെ പൂര്‍വ്വവിദ്യാര്‍ത്ഥികള്‍ക്ക് അയച്ചുകൊടുക്കുകയും ചെയ്തതായി പൊലീസ് പറഞ്ഞു. വിദ്യാര്‍ത്ഥിനി സ്‌കൂളില്‍ പോകാന്‍ വിസമ്മതിച്ചതോടെയാണ് സംഭവം പുറത്തറിയുന്നത്. സ്‌കൂളില്‍ പോകാന്‍ മടിച്ച പെൺകുട്ടിയോട് കാരണം ചോദിച്ച മാതാവിനോട് പെണ്‍കുട്ടി വിവരം തുറന്ന് പറയുകയായിരുന്നു. പിന്നീട് മാതാവിന്റെ പരാതിയെത്തുടർന്ന് പൊലീസ് നടപടി സ്വീകരിക്കുകയായിരുന്നു. തമിഴ്‌നാട്ടിലെ കടലൂര്‍ ജില്ലയിൽ നടന്ന സംഭവത്തിൽ പ്രതികള്‍ക്കെതിരെ പോക്സോ ചുമത്തി കേസ് എടുത്തതായും പ്രതികളെ കസ്റ്റഡിയില്‍ എടുത്തതായും പൊലീസ് പറഞ്ഞു.
