ഗുരുതര ചട്ടലംഘനം..പൊലീസ് സേനക്ക് നാണക്കേടുണ്ടാക്കി..സുജിത് ദാസ് ഐപിഎസിനെ സസ്പെന്ഡ് ചെയ്യും…
പത്തനംതിട്ട എസ്പി സുജിത് ദാസ് ഐപിഎസിനെതിരെ നടപടിക്ക് സാധ്യത. സുജിത് ദാസിനെ സസ്പെന്ഡ് ചെയ്യാന് ആഭ്യന്തര വകുപ്പ് ശുപാര്ശ ചെയ്തു.മലപ്പുറം മുന് എസ്പിയായ സുജിത് ദാസ് ഗുരുതര ചട്ടലംഘനം നടത്തിയെന്നാണ് റിപ്പോര്ട്ട്. തിരുവനന്തപുരം റെയ്ഞ്ച് ഡിഐജി അജീതാ ബീഗമാണ് ഡിജിപിക്ക് റിപ്പോർട്ട് നൽകിയത്. അൻവർ എംഎൽഎയെ വിളിച്ച് പരാതി പിൻവലിക്കാനായി സ്വാധീനിക്കാൻ ശ്രമിച്ചത് തെറ്റാണ്. പൊലീസ് സേനക്ക് നാണക്കേടുണ്ടായ സംഭവമാണ് ഓഡിയോ പുറത്ത് വന്നതിലൂടെ ഉണ്ടായത്. ഉന്നത ഉദ്യോഗസ്ഥർക്കെതിരായ നീക്കത്തിന് എംഎൽഎയെ പ്രേരിപ്പിച്ചതും ഗുരുതര ചട്ടലംഘനമെന്ന് റിപ്പോർട്ടിൽ പറയുന്നു.
എസ് പി ക്യാംപ് ഓഫീസിലെ മരം മുറിച്ച് കടത്തിയെന്ന കേസിലെ പരാതി പിന്വലിച്ചാല് ജീവിത കാലം മുഴുവന് താന് കടപ്പെട്ടിരിക്കുമെന്ന് എംഎല്എ പി വി അന്വറിനെ ഫോണില് വിളിച്ചുസംസാരിക്കുന്നതിന്റെ ഫോണ് സംഭാഷണം പുറത്ത് വന്നിരുന്നു. ഇത് വലിയ നാണക്കേടാണ് പൊലീസ് സേനയ്ക്ക് ഉണ്ടാക്കിയത്.
