എസ്.എഫ്.ഐ മാർച്ചിനിടെ സ്പെഷ്യൽ ബ്രാഞ്ച് എസ്.ഐയെ കോളറിൽ പിടിച്ച് വാനിൽ കയറ്റാൻ…..
പാലക്കാട് എസ്.എഫ്.ഐ മാർച്ചിനിടെയുണ്ടായ സംഘർഷത്തിനിടെ സ്പെഷ്യൽ ബ്രാഞ്ച് എസ്.ഐയെ ആളുമാറി പൊലീസുകാർ വാനിൽ കയറ്റാൻ ശ്രമം. പാലക്കാട് നടന്ന എസ്.എഫ്.ഐ മാർച്ചിനിടെയാണ് രസകരമായ സംഭവം അരങ്ങേറിയത്. അഗ്നിപഥ് പദ്ധതിയ്ക്കെതിരെ പാലക്കാട് ഹെഡ് പോസ്റ്റോഫീസിലേക്ക് എസ്.എഫ്.ഐ നടത്തിയ മാർച്ചിനിടെയാണ് പൊലീസിന് ആളു മാറിയത്. എസ്.എഫ്.ഐ പ്രവർത്തകരെ അറസ്റ്റ് ചെയ്തു നീക്കുന്നതിനിടെ സ്ഥലത്തുണ്ടായിരുന്നു സ്പെഷൽ ബ്രാഞ്ച് എസ്.ഐ സത്യനെ മുട്ടിക്കുളങ്ങര കെ.എ.പി ക്യാമ്പിൽ നിന്നെത്തിയ പൊലീസുകാർ കോളറിൽ പിടിച്ച് വാനിൽ കയറ്റാൻ ശ്രമിച്ചത്.സ്പെഷൽ ബ്രാഞ്ചിലായതിനാൽ മഫ്തിയിലായിരുന്നു എസ്.ഐ സത്യൻ. മുട്ടിക്കുളങ്ങര ക്യാമ്പിൽ നിന്നെത്തിയവർ സമരക്കാരനാണെന്ന് കരുതിയാണ് ഇദ്ദേഹത്തെ വാനിൽ കയറ്റാൻ ശ്രമിച്ചത്. ഒടുവിൽ അമളി മനസ്സിലായതോടെ കോളറിൽ പിടിച്ച പൊലീസുകാരൻ ക്ഷമ പറഞ്ഞ് തടിയൂരി. സ്ഥലത്തുണ്ടായിരുന്ന മുതിർന്ന പൊലീസുദ്യോഗസ്ഥരാണ് സത്യൻ സ്പെഷൽ ബ്രാഞ്ച് എസ്.ഐ ആണെന്ന് ക്യാമ്പിൽ നിന്നും വന്നവരോട് പറഞ്ഞത്. പാലക്കാട് നഗരം കേന്ദ്രീകരിച്ച് പ്രവർത്തിക്കുന്ന സ്പെഷൽ ബ്രാഞ്ച് എസ്.ഐയാണ് സത്യൻ. നഗരത്തിലെ സമര സ്ഥലത്തെല്ലാം ഇദ്ദേഹം വിവര ശേഖരണത്തിനായി എത്താറുണ്ട്. എന്നിട്ടും ആളുമാറിയത് പൊലീസിന് തന്നെ നാണക്കേടായി.