ആണ്കുട്ടി പിറന്നതിന് 19കാരനെ ബലി നല്കി
മൂന്ന് പെണ്കുട്ടികളായിരുന്നു അയാള്ക്ക്. ഒരാണ്കുട്ടി ഉണ്ടാവണേ എന്ന പ്രാര്ത്ഥനയുമായി നടക്കുന്ന സമയത്താണ് ഒരു മന്ത്രവാദി അക്കാര്യം പറഞ്ഞത്, ആണ്കുട്ടി ഉണ്ടാവാന് ദേവിക്ക് ഒരു ചെറുപ്പക്കാരനെ ബലി നല്കിയാല് മതി. അങ്ങനെ അയാള്ക്കൊരു ആണ്കുഞ്ഞ് പിറന്നു. അതിനു പിന്നാലെ അയാളൊരു ചെറുപ്പക്കാരനെ ദേവീക്ഷേത്രത്തിലേക്ക് കൊണ്ടുപോയി വിഗ്രഹത്തിനു മുന്നില്വെച്ച് കഴുത്തറുത്തു കൊന്നു.
32 കാരനായ രാം ലാല് പ്രജാപതിയാണ് 19 വയസ്സുള്ള ദിവ്യാംശ് കോല് എന്ന ചെറുപ്പക്കാരനെ ദേവിക്ക് ബലി നല്കിയത്. ഇലക്ട്രീഷ്യനായി ജോലി ചെയ്യുകയായിരുന്നു രാം ലാല്. കഴിഞ്ഞ ദിവസമാണ് ഗ്രാമത്തിലെ വിജനമായ സ്ഥലത്തുള്ള ദേവീക്ഷേത്രത്തില് ഒരു ചെറുപ്പക്കാരന്റെ മൃതദേഹം കാണപ്പെട്ടത്. കഴുത്തറുത്ത നിലയില് ചോരയില് കുളിച്ചുകിടന്ന ചെറുപ്പക്കാരനെ പിറ്റേന്നാണ് തിരിച്ചറിഞ്ഞത്. സമീപ ഗ്രാമത്തിലുള്ള ദിവ്യാംശ് ആണ് മരിച്ചതെന്ന് തിരിച്ചറിഞ്ഞതോടെ പൊലീസ് അന്വേഷണം ആരംഭിച്ചു. തുടര്ന്ന് നടത്തിയ അന്വേഷണത്തിലാണ് രാംലാല് പിടിയിലായത്. സംഭവം നടന്ന ദിവസം ദിവ്യാംശിനോടൊപ്പം ഇയാളെ കണ്ടിരുന്നുവെന്ന വിവരത്തിന്റെ അടിസ്ഥാനത്തിലാണ് പൊലീസ് രാംലാലിനെ പിടികൂടിയത്. ചോദ്യം ചെയ്യലിന്റെ തുടക്കത്തില് പരസ്പര വിരുദ്ധമായി സംസാരിച്ച രാംലാല് അധികം വൈകാതെ കുറ്റസമ്മതം നടത്തിയതായി പൊലീസ് പറയുന്നു. മധ്യപ്രദേശിലാണ് ഞെട്ടിക്കുന്ന ഈ സംഭവം നടന്നത്.